AR biak-in hmun chungchangah kan inrawlh lo - ZPM President

ZPM president Lalliansawta chuan, an party pisa hmun atana Assam Rifles biak-in neih an tum anga sawi chu thu dik lo a nih thu sawiin, neih tum anga hma la anga sawia mipui hruai kâwi tumtute chu ngaihdam dil turin a phût.

Lalliansawta hian nimin khan an ZPM pisaa inkhawmah thu sawiin, "Party office hmun atan Assam Rifles biak-in hi a sawi pawh kan sawi ri ngai lo a, kan inrawlh lo. Kan inrawlh ang zawnga thu tithangtu, mipui hruai kawi tumtute hian ZPM party chungah ngaihdam dil ngei rawh se," a ti.

ZPM-in party office neih loh avangin party office neih a ṭul thu an sawi fo tih sawiin Lalliansawta chuan, "Kan hotute rilruah hual sa leh biak mek pawh kan nei. Assam Rifles biak-in saw kan sawi ri ngai lo hrim hrim," a ti a; AR-te chu insawn chhuak pawh ni se, AR biak-in hmun ni lo hmun ṭha leh remchang zawk beisei tur a awm ngei tur thu a sawi.

ZPM President chuan, mi rilru hruai kawi tuma mi ṭhenkhatin AR biak-in politics-a inbeih nan an hmang duh chu pawi an tih thu sawiin, "Tunlai khawvel changkang tawhah dâwt chu awlsam taka laihlan leh mai theih a ni tawh avangin dâwt sawi hi a tlo lo lehzual. Hetiang zawnga politics khelh hi ram hlui zia dik tak a ni a, ram hlui zia hmanga politics khelh hi mipuiin an kham tawh a ni," a ti.