Sorkarin kawng dik a zawh mek - Lalthansanga

Minister Lalthansanga chuan, kum 40 dawn chhunga sorkar kal tawh dan chu thlak nghal duak theih ni lo mah se, zawi zawia siam rem chhoh zel a nih thu leh sorkarin kawng dik a zawh mek thu a sawi.

Lalthansanga hian nimin khan ZPM pisaa inkhawmah thu sawiin, "Kum 40 dawn sorkar lo kal tawh dan hi thâwk leh khata thlâk hlawk theih ni lo mah se, zawi zawiin a insiamrem chho zel. Inrenchemna kawngah sorkar a kal nasa a, sorkar officer-in office-a TV an kawl theih dante leh kalphung ṭhenkhat dangte pawh siamṭhat zel niin, sorkar hi zawi zawiin kawng dik lam panin a inher mek a ni," a ti.

Sorkarin uluk takin sum a enkawl nia sawiin Lalthansanga chuan, "Sorkar hmasain April-August, 2023 chhunga sum a pûk chu cheng vbc. 1,936.4 a ni a, ZPM sorkarah April-August, 2024 chhunga sum kan pûk zat chu vbc. 977.7 a ni," a ti a; hunbi inang rengah ZPM sorkarin sum a puk zat aiin MNF sorkarin a puk zat cheng vbc. 1,000 chuanga a tam zawk thu a sawi.

Lalthansanga hian a enkawl Sericulture department chungchang sawiin, Mizoramin Central Board of Silk Conclave a thlen thu leh Guwahati tih loha hmarchhaka conclave thleng hmasa ber an nih thu a sawi a, "Muga (pangang chi khat) project-ah pawh benefeciary 500 vel thlan a ni dawn a, Mizoram chauh hi India hmarchhaka muga khawi theihna awm chhun a ni," a ti.

Mizoramah Chief Minister Rubber Mission chu kalpui ṭan a nih thu sawiin Lalthansanga chuan, Zirtiri Residential Science College hmun hluiah training centre buatsaih a nih dawn thu a sawi a; North Eastern Council aṭangin kuhva scope leh a ro siamna tur project pek an nih dawn thu leh ZPM sorkarah kuhva tawlhrûk a kimkit thu a sawi bawk.

Lalthansanga chuan, ṭawng-ṭaina nena sai ip puan sina an dilnate Pathianin a chháng nia sawiin, "Mizoram hian kawng dik a zawh ṭan a, kan ṭanhona leh Pathiana kan tluk luhna hian awmzia a nei ngei ang," a ti.