Mizo ṭhalaite'n Japan, Korea, China ram an dai dar dawn - MYC Chairman
Aizawl West College chuan nimin khan an hmunah 'West Impress - State level Workshop - Innovative Education Aligning Mizoram Curriculum with Future Career Opportunities' tih hun an buatsaih a, Mizoram Youth Commission (MYC) chairman Malsawmzuala Ralte-in hmanpuiin, chuan nimin khan Mizo ṭhalaite'n Japan, Korea leh China ramte an dai dar dawn thu a sawi.
MYC Chairman chuan, ṭawng a pawimawh avangin ṭawng zirna hmunpui, Centre of Excellence for Language Learning din turin hma an lak mek thu a sawi a, "Kan state tan pawh human resource kan neih hi kan ro hlu a ni. India ram hmun hrang hrang bakah khawchhak lam Japan, Korea, China ramte kan ṭhalaite’n an dai dar dawn a, chutiang tur chuan chak takin MYC hian hma a la mek a ni," a ti.
University syllabus chu New Education Policy hnuaia duan vek a nih avangin kut themthiamna lam, eizawnna atana ṭangkai tur syllabus-ah telh a nih thu sawiin Malsawmzuala chuan, "Hei hian eizawnna tak tak hna kan dapnaah minpui thei dawn a ni," a ti a; ṭhalaite'n taimakna, tumruhna, teirei peihna, time table-te nei se a duh thu a sawi.
MYC Chairman tarlan danin, MYC, Honda India Foundation leh Visan Foundation-te ṭanghoin Project Buniyaad Hospitality Management Training Course an kalpui mek a, training chhuakte chu India ram hotel lianahte an thawk nghal thei dawn. Tirupati lama thawk turin Mizo ṭhalai 100 tirh chhuah tum a ni a, advertisement tichhuak tawhin hmalak mek a ni.
Malsawmzuala Ralte chuan, Japan lama inhawn avangin hriselna lam mai bakah, NSDC nen thawhhona tur an sawiho tawh chu a hmun en thlithlai tura an kal thuai dawn thu te, Aizawl, Lunglei, Saiha, Serchhipahte coaching centre an neih mek thu leh Kolasib-ah hawn thuai an tum thu te, Mission UPSC (Taitesena)-ah chak taka hmalak a nih thu te, Mandarin (Chinese) ṭawng zirturin Mizo ṭhalai pahnih tirh mek an nih thute a sawi bawk.
Zirhonaah hian Mizoram Education Reforms Committee working chairman Prof. Lalbiakdiki Hnamte, Dr B Lalzarliana leh Lailen Pvt.Ltd hotu Alan Lalhriatpuia leh mithiamte'n thu an sawi a ni.