Khualzin hîp thei khuate sorkarin a vilpui dawn - Tourism Minister

Tourism minister Lalrinpuii chuan, Sialsuk khua a chhuàn thu a sawiin, Sialsuk khuain khualzin hîp thei tur hmun mawi leh nuam a neihte chu sorkarin theihtawp chhuaha a vilpui tur thu a sawi.

Lalrinpuii hian nimin khan a pisaah Sialsuk khawtlang hruaitute kâwmin, Sialsuk khuain India ram pum huapa ‘Best Tourism Village' (community based category) lawmman an dawn lawmpuina hun a buatsaih a; Tourism secretary Dr Lalrozama leh Department officer-te'n an ṭawiawm.

Tourism Minister chuan, "Khualzin hîp tur chuan thil dang zawng aiin a hmuna cheng mipui an pawimawh a, in khaw hmun hlute vawng himin, in hmalakna entawn tlak tak takte hi chhunzawm zel ang che u," tiin Sialsuk khawtlang hruaitute a chah.

Inkawmhonaah hian Sialsuk VC president R Lalruatkima pawhin thu sawiin, Best Tourism Village an nih theih dan a sawi a; Sialsuk khuaa tourism tihchangtlun zel dan turte sawiho nghal a ni bawk.

Sialsuk khua hian community-based category-ah Best Tourism Village Awards 2024 an dawng a, September 27, 2024 khan India vice president leh Union Tourism and Culture minister-te hnen aṭangin lawmman hi an dawng a ni.