Hna thawhna tur sum hmuh veleh hma la nghal thuai turin VC-te chah

Local Administration Department (LAD) secretary Teresy Vanlalhruaii hoin nimin khan Serchhip DC conference hall-ah Serchhip khawpuia village council member-te'n VC hmalakna chungchang an sawiho a; LAD Secretary chuan, hna thawhna tur sum an hmuh veleh muangchang loa hma la nghal thuai ṭhin turin VC-te a chah.

Teresy Vanlalhruaii chuan, VC-te'n hna an thawh chhan leh sum an hmuhna hnárte an hriat chian loh chuan hna thawh ṭhat a harsat theih thu a sawi a, "Engkim in hriat ve vek a ṭul. Kum tam tak chhung thingtlang hmasawnna turin ṭan lak a lo ni tawh a, kum 2021-22 ah Finance Commision-in a recommend angin 15th Finance Commission-ah kan lut. Khawtlang mipui hmasawnna atana in sum hmuhte dik leh fel takin hmang u la, hna thawhna tur sum in hmuh veleh muangchang loin hma la thuai ṭhin ang che u," a ti.

Serchhip DC Paul L Khuma pawhin thu sawiin, "Kalphung leh tih dan pangngaiin a kal mai theih a, amaherawhchu, chumi piah lama hmasawn lehzual tur chuan thâ leh ngaihtuahna sèn belh a ngai nasa. VC-te mawhphurhna a pawimawh em em a, kan khawtlang chawi kâng tura Pathianin a dah in ni tih hre reng ang che u," a ti a; an scheme khawih laite hre chiang a, official-te finchhuahtu nih tum turin a chah.

Inkawmhonaah hian sorkar leh VC-te thawhhona chungchang te, khawtlang hmasawnna hna kenkawh kawnga hriat turte leh harsatnate sawiho a ni.