Saitualah International Girl Child Day khâr

Saitual District Hub for Empowerment of Women (DHEW) leh District Child Protection Unit chuan nimin khan Saitual College auditorium-ah International Girl Child Day khârna leh Saitual district-a hmeichhe naupang hlawhtlinna changte lawmpuina hun an buatsaih a, bawrhsap Dr Lalngura Tlau-in a hmanpui.

International Girl Child Day hi kum tin October 11-ah hman ṭhin a ni a, kumina thupui chu 'Girls vision for the future' tih a ni. Girl Child Day pual hian Saitualah October thla chhungin hmalakna hrang hrang - anganwadi centre-a PMMVY chungchang awareness buatsaih te, Rashtriya Poshan Maah - Fruit Festival leh financial literacy campaign-te buatsaih a ni.

Dr Lalngura Tlau chuan, Mizo hmeichhiate'n hma an sawn nasat thu sawiin, "Hmeichhe chunga hleihlenna awm ṭhin lakah hmeichhiate humhim an ṭul. Chumi tur chuan Saitualah Mission Shakti hnuaiah hmalak a ni a, hmeichhe baihvaite tlûk luhna tur One Stop Centre pawh din a ni tawh," a ti a; naupangte dikna chanvo rahbeh a nih loh nan department hrang hrangte ṭhawhhona a pawimawh thu a sawi.

International Girl Child Day khârnaah hian Saitual district-a hmeichhe naupang, hlawhtling (girl achiever) lawmman dawngtute hneh lawmpuina hlan a ni a; chu'ngte chu - Catherine Malsawmzuali, Lalhluzuali, Lalruatpuii, PC Lalremsiami, PC Lalrinpuii, Vanlalmuanpuii, Vanlalrinmawii Khiangte leh Zodinmawii te an ni.