Mizo hnam thil ngaihthahah sorkar puh

MNF party chuan nimin khan an pisaah chhung inkhawm an buatsaih a; thusawitu MNF Ṭhalai president Robert Romawia Royte, MLA chuan, ZPM kaihhruai sorkarin Mizo hnam thil pawimawh tak tak a ngaihthah nia sawiin, pawi a tih thu a sawi.

Robert Romawia chuan, Mizoram leh Myanmar inkara free movement regime (FMR) hlih, Myanmar ramri hung, ṭhenawm ram leh state aṭanga Mizo raltlan ngaihven chungchang, Assam nena ramri leh sorkar anga Mizo hnam humhalh chungchangahte ZPM sorkarin hian mipui beisei angin hma a la lo niin a sawi a, "CM zahawm takin vai ram media thleng thlenga dâwih aw a chhuah hi a pawi tak zet a ni," a ti.

MNYF President chuan, Phuldungsei khuaa mi 85-te Mizoram ration card aṭanga paih an ni chu a serious tak zet nia sawiin, "Phuldungsei khuaa India ram dan anga an ration card leh Aadhaar card online-a link vek tawh a ni," a ti a; Aadhaar card leh ration card online-a zawm leh vat turin sorkar an phût thu a sawi.

Robert Romawia Royte chuan, tunlaiin dâwt leh thu dik famkim lo a lêng nasa tih sawiin, "Thu dik puanzar tam a ṭul tak zet," a ti a; Assembly session-a MLA-te zawhna minister-te'n an chhan danah thil dik lo a awm ṭhin niin a sawi. Sinlung Hills Council inthlanpui awm turah MNF-in candidate ṭha tak tak an neih avang leh ZPM sorkar chet danin mipui beisei a phâk loh avangin MNF-in sorkar an siam ngei a beiseiawm niin a sawi bawk.