KHAWTHLIR

Chhiatna thleng hmachhawn inzirtir

ICFAI University, Mizoram chuan International Day for Disaster Reduction Day (October 13) pualin nimin khan hun an hmang a, chhiatna laka invên dan leh chhiatna thleng hmachhawn dan inzirtirna an buatsaih. Zirhonaah hian Aizawl District Disaster Management Authority hnuaia Quick Response Team-te'n zirlai leh zirtirtute chu chhiatna a thlena hmachhawn dan tur an zirtir a ni.

Heroin man

Serchhipa Excise and Narcotics department mi leh sate chuan October 13, Pathianni khan Evy Lalramhluni (34) w/o Gospel Lalruatfel, Thenzawl Venghlun hnen aṭangin heroin (no. 4) gram 75.82 an man. END hian Narcotics Drugs & Psychotropic Substances Act, 1985 tlawhchhanin thubuai an ziak lut a ni.

Paih khap

Champhai sub-divisional magistrate Ngulzaṭhuama chuan thupek chhuahin, Champhai-Zote kawng, Vengthar sa talhna aṭanga Phaizawl kawngpui pawhna inkar kawng kamah leivûng, ran thi, in ṭhiahna leh bawlhhlawh paih khap a nih thu a puanga "He'ng thilte hi paih an awm ṭhin a, hei hian Champhai khawpui tuitlan Tuipui pawhtu Keilungliah lui a tibawlhhlawhin a hnawh ṭhin bakah, Keilungliah chuanhnuaia leilet leh ramte a tichhiain a chhilh bo mek," a ti. Thupek zâwm lote chu BNS, 2023 Section 223 hmanga hrem theih an ni.

Lehkhabu tlangzarh

V Lalnunmawia leh Dr Vanlalṭanpuia te lehkhabu buatsaih 'Physical Geography of Mizoram' tih chu nimin khan adviser to chief minister Dr KC Lalmalsawmzauva'n Aizawl North College conference hall-ah a tlangzarh.

Buh seng sa kâng

Chhippui khaw loa thlám pakhat chu a kâng a, buh seng sa phur 37 vel a kâng ral. Thu dawn danin, lo neitute hi chawlhkar liam ta khan ramah an riak a, October 12, Inrinni khan tlaiah an haw a; nimina an feh leh chuan a lo kâng ral vek tawh. Thlâm a kan ral vek bakah buh an seng sa zawng zawng pawh a kâng ral a ni.