CM hoin zu khapna dan sawiho

Chief minister Lalduhoma chuan nimin khan a pisaah Excise & Narcotics department hotute a kâwm a, zu khapna dan, The Mizoram Liquor Prohibition Act, 2019 leh The Mizoram Liquor Prohibition Rules, 2022 kenkawhnaa thil pawimawhte leh dan hman mek tihphuisui dan turte a sawipui.

Ruihhlo dona chungchangah Chief Minister chuan, ZPM party-in sorkarna an chan tirh aṭangin ruihhlo donaah theihtawp an chhuah nghal thu a sawi a, "A bik takin Excise & Narcotics department leh tlawmngai pawl hrang hrangte hmalakna a fakawm hle; tih tak zetin an bei tih a hriat. Chutih rualin, kan hmabak a la ko hle a, ṭhahnemngai takin ruihhlo hi do zel tur kan ni," a ti.

Inkawmhonaah hian Excise & Narcotics minister Lalnghinglova Hmar leh secretary Lalramsanga Sailo bakah, commissioner Z Lalhmangaiha leh officer dangte an tel a ni.