Kum ruk hnuah J&K-ah President rule hlih a ni ta

Jammu and Kashmir Assembly inthlanah National Conference leh Congress ṭangkawp chuan sorkar siam thei turin hnehna an chang a, sorkar thar din a nih theihna turin kum ruk chhung J&K-a President rule lo hman tawh chu Pathianni khan hlih a ni ta.

Union Home Ministry chuan hriattirna ti chhuakin, J&K-a President rule chu hlih a nih thu a sawi. Hei hi Union territory-ah hian sorkarna thar siamna tura kawng pawimawh a ni.

Assembly inthlanna neiha hnehna changtu, NC leh a thawhpuiten sorkar thar an siam turah hian NC vice president Omar Abdullah chu NC legislature party hruaitu atan lungrual taka thlan a ni tawh a, J&K Chief Minister thar a ni dawn ta a, sorkar thar lak luh hun tur erawh tih chian a la ni lo.

Kum 2018 khan khatih laia India President, Ram Nath Kovin chuan J&K-ah PDP-BJP ṭangrual sorkar a tluk chhiat avanga Governor rule hnuaia thla ruk a awm hnuah President rule hi a puang a, kumin thleng khan hman zui a la ni.

Kum 2019 August thlaa central-a BJP sorkarin J&K special status pekna, Article 370 a tih tawp hnuah, J&K state chu Union Territory pahnih, J&K leh Ladakh ah ṭhen a ni zui bawk.

J&K Assemmbly inthlanah khan seat 90 awmah NC hian seat 42 lain, a thawpui Congress chuan seat ruk a la ve bawk. BJP chu party mala seat la hnem ber dawttu niin seat 29 a la a, AAP chuan seat pakhat an la ve bawk a ni. Hei Article 370 tihtawp hnuah J&K-a assembly inthlan an neihna hmasa ber a ni.