SEDP-ah cheng nuai 3,849.56 Department 5-te pek a ni tawh
Mizoram sorkar flagship programme, Socio Economic Development Programme (SEDP) hnuaiah ṭanpuina dawngtu tur awm dan azirin department hrang hrangte hnenah September 1, 2020 thleng khan cheng nuai 3,849.56 pek chhuah a ni tawh.
Vanglaini-in document a neiha a lan danin, SEDP hnuaiah hian sorkar department panga - Agriculture, AH&Vety, Commerce & Industries, Fisheries leh Horticulture hnenah sum pek a ni. Sum dawng tam ber AH&Vety department chuan cheng nuai 1,860 an dawng a, dawng tlem ber Commerce & Industries department-in cheng nuai 260 an dawng tawh.
Planning & Programme Implementation department tarlan danin, SEDP hlawhtling turin line department a hranpain thlan a ni lo a, department zawng zawng chu a ṭul dan anga SEDP tihlawhtlin nan hma la tura tih an ni.