School Band Competition buatsaih a ni
Samagra Shiksha, Mizoram chuan nimin khan 1st MAP khelmual, Armed Vengah School Band Competition an buatsaih a, pipe band hmeichhiaah Saitual High School Girls Band leh mipaah Southern High School, Hnahthial Boys Band pakhatna an ni.
School Band Competition-ah hian mipa leh hmeichhia a hrangin an intihsiak a; district hrang hrang aṭangin pipe band 12 an tel. Kumin hi Aizawl district pawn lam aṭanga tel an awm vawi khatna a ni a; Aizawl district aṭanga tel ṭhin Mizo H/S chu kum hmasaah national level-ah lawmman an lak avangin tun ṭumah hian an tel thei rih lo.
Kumina intihsiaka pakhatna Saitual H/S Girls Band leh Southern H/S Hnahthial Boys Band-te chu Eastern Zone Competition-ah Mizoram aiawhin an tel dawn a ni.
School Band Competition hi sorkar laipuia Ministry of Education-in Ministry of Defence thawhpuiin kum tin an buatsaih ṭhin a, state level leh zonal level-te chu Samagra Shiksha-in an buatsaih a, national level chu NCERT-in a buaipui thung. State level-a pakhatnate zonal level competition-ah an intihsiak a, zonal level-a ti ṭhate national level-ah an intihsiak leh ṭhin.
India rama state leh union territory-te chu zone pali - Eastern, Western, Southern leh Northern zone-ahte ṭhen a ni a; Mizoram chu Eastern zone-ah a awm. Eastern zone-a awm dangte chu - hmarchhak state pariat bakah, Jharkhand, West Bengal leh Odisha te an ni.