Mitdel tiang hawlte dimdawi turin ngen

Mizoram Blind Society (MBS) chuan mitdelte'n tiang vár an hman ṭan ní, White Cane Day - October 15 pualin thuchhuah an siam a; Zoram mipui, abikin lirthei khalhtute chu mitdel tiang hawla khawlaia kalte dimdawi thiam turin an ngen.

MBS chuan, Mizoram mipui leh sorkar hruaitute White Cane Day chibai an bûk tih tarlangin, "White-Cane Day pual hian Zoram mipui, a bikin lirthei chi hrang hrang khalhtute mitdel tiang hawla khawlaia kalte dimdawi thiam a, an tiang hawlte zahsak turin kan ngen thar leh a ni," an ti.

MBS chuan, "Zalen leh thlamuang taka khawlaia an veivah ve theih nana anmahni hmangaihna leh hriatthiamna nena ṭanpui ṭhin turin Zoram mipui leh sorkar, kohhran leh khawtlang hruaitute zawng zawng kan ngen a ni," an ti a; mitdelte'n khawvel hran an neih loh thu an sawi.

MBS tarlan danin, kum 1921 khan thla laa eizawng James Biggs chu chetsualnaah a mit a del a, a mitdel hnuah khawlaia a chhuah chángin tiang vâr a hawl ṭhin a; tiang vár a hawl chhan chu - lirthei khalhtute leh kawtthlera veivâkte'n amah chu khaw hmu lo, mitdel a ni tih awlsam zawka an hriat theih nan a ni.

Tiang var chu mitdel tan a ṭangkai bik tih hriat a nih avangin khawvel hmun dangah pawh an hmang ve ta zel a; USA-a The National Federation of the Blind ngenna ang leh USA sorkar pawmpuinain kum 1964 aṭang khan October 15 chu White Cane Day atan hman a ni ta a ni.