ZPM sorkarin mipui bumna atan dâwt an sawi mai mai - MNF VP

MNF party chuan November 5, 2024-a Sinlung Hills Council (SHC) inthlan tur pualin nimin khan Sakawrdaiah campaign bul an ṭan a, an hun hmanpuitu MNF vice president Lalchhandama Ralte, leader of opposition chuan, ZPM kaihhruai sorkar chu mipui bumna atan dâwt sawi mai maiah a puh.

MNF Vice President chuan, ZPM-in state-ah sorkarna chang mah se, chhung tin thleng phak thil tih an nei lo niin a sawi a, "Thil eng eng emaw zuarin, eng ang policy pawh duangin mipui lakah intiamna hrang hrang nei ṭhin mah se, pawisa an nei lo. Mipui bum nan an sawi mai mai a ni," a ti.

Party dangin thlêmna chi tinrêng hmangin an la rawn thlêm dawn tih sawiin Lalchhandama chuan, "Tu emaw dâwt sawi vanga buai tur kan ni lo. Sorkar thla 10 lek kan la hrawn chhung hian kan ti ang an tih engmah an ti lo, kan ti lo ang an tih ang zelin an ti zawk a ni," a ti a; mita an hmuh leh benga an hriat hmanga thutlukna siam turin mipui a chah.

Lalchhandama Ralte chuan, party dangte'n thu tam tak an sawi ang a, hmar tlangdung hmangaih ber angin an insawi dawn tih sawiin, "MNF ram leh hnam hmangaih lote pawh an rawn ti ang. Mahse, in hmu vek, sorkar tam tak kan hrawn tawh a lawm, hmar thimpui tih ṭhin kha MNF kan sorkar khan êng kan hmu ṭan a, kan êng telh telh a, zirna lamah emaw, kawng chi kimin hmalam kan pan tawh a nih hi," a ti.

MNF Vice President chuan, hmar tlangdung hmasawnna ṭhanṭhu leh mekin a rilru a tihnat thu sawiin, Mizoram Assembly inthlan lehah MNF chu sorkar leh mai tur an nih avangin SHC inthlan awm turah pawh MNF thlang tling ngei turin mipui a ngen a ni.