SHC-in hma a sawn zel theih nan kan candidate vote rawh u - Duhoma

ZPM leh HPC ṭang dun chuan November 5, 2024-a Sinlung Hills Council inthlan tur atan nimin khan Sakawrdai, Saiphai leh Suangpuilawnahte campaign bul an ṭan a, chief minister Lalduhoma, minister K Sapdanga leh minister of state B Lalchhanzovate'n an hmanpui. Lalduhoma chuan, SHC-in hma a sawn zel theihna atan ZPM candidate-te vote turin mipui a ngen.

Sakawrdaia hun hmanpuitu Lalduhoma chuan, tun hmain hun rei tak chhung Hmar mipuite sorkarin a enkawl danah lungawi loin ralthuam lekin hun an hmang ṭhin tih sawiin, "Ralthuamte tunga inremna thuthlung ziah a nih hnuah pawh inremna tihhlawhtlin lohin a la awm reng a, chuvangin, nghet taka mi rinawm lote hnung zui hi in bat niin a lang lo," a ti.

SHC chu phuahchawp takin hun rei tak a kal tawh tih sawiin Duhoma chuan, "Chairman pawh an duh duha an thunun theih an dah ṭhin. SHC-in dan mumal tak a neih theih nan theihtawpin kan lo au ve tawh ṭhin a, chumi hnuah rules siam niin, hun rei tak hnuah act mumal tak kan lo nei ta," a ti a, SHC kalkawng a thui thu a sawi.

Lalduhoma chuan, SHC chu sorkar hmasa hun laiin cheng nuai 150 an pe ṭhin tih sawiin, "A beitham hle tih kan hriat a, sorkar thar chuan nuai 190 kan pek belh. Chu mai bakah, Lok Sabha MP-in a MP fund aṭangin cheng nuai 75 a theh chhuak tawh. Sorkar thar hian Tuivai lei siamṭhat a ngai pawimawh em em a, hmanraw thar hmangin tunah hian siam a lo ni ta," a ti.

Bana Kaih Scheme chu kut hnathawk-tute leh ṭhalai mahni kea din tumte'n hlawhtlinpui ngei se a duh thu sawiin Lalduhoma chuan, "SHC-in hma a sawn a, leirem a rah zel theih nan kan candidate duhawm tak takte hi lo vote tling ngei turin ka ngen a che u," a ti. Lalduhoma hian Sakawrdai, Ratu leh Sunhluchhip biala ZPM zawm thar mi 238 a lawm lut a ni.

Suangpuilawna hun hmanpuitu minister K Sapdanga chuan, ram hmasawnna turin veng leh khuate, area bikte inrêlbâwlna hrang hrang an nei hlawm tih a sawi a, "Hengahte hian hruaitu thlan a ṭul ṭhin. Inthlanahte hian state-a rorel mekte nena thawhona ṭha nei thei tur te, ngampa taka khawtlang leh council mamawhte thlen theitu turin sorkarna fawng chelh mek party-te thlan tlin a finthlak," a ti.

K Sapdanga chuan, thawhhona a ṭhat loh chuan hmasawnna hnuh chhuah turte a muan phah theih thu sawiin, "Mipuiin kan tuar a, hruaitute tan pawh a hrehawm ṭhin. Chuvangin, hun inher mila vote pawh in thlak thiam ka ring," a ti a; ZPM leh HPC candidate-te thlang tlin ngei tura an duh thu a sawi.