Tuialhthei black-in kan hralh lo - PETUM

Petroleum Entre-preneurs' and Trans-porters' Union of Mizo-ram (PETUM) chuan thuchhuah siamin, petrol pump-te'n dan lo (black)-in tuialhthei an hralh loh thu leh sorkara thuneitu ṭhenkhatin petrol pump-te licence tihtawpsaka vauna thu an sawi ṭhin chu ṭha lo an tih thu an tarlang.

PETUM chuan, Mizoram Commercial Vehicle Union (MCVU)-in October 13, 2024-a thuchhuah an siamah, Mizoramah oil tanker a lut ṭha nia an tarlan chungchang an sawifiah a, "Oil tanker-te hi kawng a la ṭhat tawk loh avangin an thlen hun tur angah an thleng hman lo a, a lêt dawnin an tlân tlem a, hei vang hian tuialhthei lak luh kawngah duhthu a la sam lo hle. Pump-te pawhin duh angin hralh tur kan dawng thei lo," an ti.

An tarlan danin, Mizoramah thla khatah tuialhthei kilolitre 8,500 vel mamawh ṭhin a nih laiin, tun dinhmunah chuan kilolitre 7,500 vel chauh an la lut thei a; Kolasib district-a pump-te tih loh pump dangah chuan tuialhthei duhkhawp hralh tur an nei thei lo a ni.

PETUM chuan, petrol pump-te chu hralh chhuah tur bituk sa nei an nih thu leh an sumdawnna a kal ṭhat theih nan ṭan lak a ngaih viau thu an tarlang a, "Mipui harsatna siam kan tum ngai lo a, hnianghnar taka mipui mamawh phuhrûk dan harsa chung chungin kan ngaihtuah zawk ṭhin. Pump-te hian a black-in kan hralh lo a, min rawn dawrtu customer-te hnenah kan hralh mai a ni," an ti.

Tuialhthei hralh chungchangah thu dik tâwk lo leh dan kalha tih a awm hriat a nih loh laia MCVU-in press release an siam khum chu hriatthiam harsa an tih thu sawiin PETUM chuan, "Kan sumdawnna pawl dangin an duh dan anga kawih her an tum hi a mak kan tiin kan hrethiam lo hle a ni," an ti a; thu inchhuah khum tawp loa thu chiang zawk inhriatsaka inbiak tlan zawk ṭhin ni se an duh thu an tarlang.

PETUM chuan, "Sorkar lama thuneitu ṭhenkhatte'n petrol pump-te licence tihtawpsak hiala vauna an sawi chhuak ṭhin hi a ṭha kan ti lo hle a, hetianga ti lo a, thil awmzia hre chiang tura sawiho ṭhin ni zawk se kan ti hle a ni," an ti bawk.