KHAWTHLIR

Environmental awareness campaign

Urban Development & Poverty Alleviation department leh Save the Riparian chuan thawhhona thuthlung an ziah angin nimin khan Siaha DRDO conference hall-ah Environmental Awareness Campaign an buatsaih. Campaign-ah hian Siahaa sikul ṭhenkhat leh tlawmngai pawlte an tel a; Save the Riparian aiawh Romalsawma Hmar leh UDPA aiawhin K Lalruatpuii ten faina leh thianghlimna chungchang an zirtir a ni.

Din champha lawm

Mizoram Upa Pawl, Thakthing Veng unit chuan nimin khan an kum 50 (golden jubilee) tlin an lawm. Zing karah bialtu MLA Lalchhuanthanga'n jubilee lungphun a hawng a, tlaiah jubilee ruai an ṭheh a ni.

TB sawiho

Siaha District Tuberculosis Forum chuan nimin khan additional DC Abraham Beirazi Khithie kaihhruaiin Siaha district-a TB dinhmun an sawiho. District TB Centre-ah kumin January aṭanga nimin thleng khan khâk (sputum) endik 314 zinga 34-te chu TB vei an ni tih hmuhchhuah a ni a, enkawl mek mi 98 an awm tih tarlan a ni.

Inzirtirna hun hmang

Lunglei District Health Society leh Salvation Army Southern Division Youth Council chuan October 14, Thawhṭanni zan khan Salvation Army Youth (SAY) member-te tan Horeb Corps-ah ruihhlo ṭhat lohzia leh natna inkai chhàwn theih loh (non-communicable disease) chungchang inzirtirna an buatsaih. Zirhona hun hman zawhah Lungleia Health department mi leh sate'n SAY member-te hriselna dinhmun an endik nghal a ni.

Heroin man

Serchhipa Excise and Narcotics department mi leh sate chuan October 14, Thawhṭanni khan sahbawn bawm pangaa dah heroin gram 62.12 leh a neitua puh Lalrinmawia (24) s/o Lalrinawma leh Mimi Lallawmzuali (34) d/o Rozama, Bazar Veng,Thenzawl ve vete an man. Ruihhlo man kaihhnawihah hian Narcotics Drugs and Psychotropic Substances Act, 1985 tlawhchhanin thubuai ziahluh a ni.