Internet leh mobile phone-te ṭangkai zawka hman inzirtir a ṭul - Deputy Speaker

Mizoram Journalists' Asso-ciation (MJA) leh Mizoram Police chuan nimin khan Kolasib Press Club-ah Seminar on Cyber Crime an buatsaih a; khuallian Assembly deputy speaker Lalfamkima chua, internet leh mobile phone-te chu sual tih nan leh misualte inbumtirna hmanruaa hmang loin, ṭangkai zawka hman dan inzirtir a ṭul thu a sawi.

Lalfamkima chuan, khawvel thiamna leh changkanna ṭhang zelin mihringte tan kawng tam takah hmasawnna a thlen rualin, sualna lamah pawh nasa takin kawng a hawng tel tih a sawi a, "Thiamna leh hriatna hi mi tin kutphaha hùm theih maia ban phak awlsamin a awm tawh a, internet leh mobile phone hi sual tih nan leh misualte inbumtirna hmanruaa hmang loin, ṭangkai zawka hman dan kan inzirtir a ṭul hle a ni," a ti.

Deputy Speaker chuan, internet kaltlanga inbumna leh dan loa che ṭhinte man chhuah kawnga Mizoram Police-te hmalakna chu chhuanawm a tih thu a sawi bawk.

Zirhona hi MJA Gen. Hqrs vice president C Lalhmachhuana'n a kaihruai a, Cyber Crime Police Station-a inspector MS Dawngliana'n cyber crime chungchang a sawifiah. MJA, Kolasib district president Andrew VL Auva leh Cyber Crime SP VL Lura Hauzel te pawhin thu an sawi.

Cyber Crime SP chuan, "Mizoram-ah online hmanga sum inchhuhsakna, mipat hmeichhiatna hmanga intihmualphona leh social media-a mimal tihmualphona thil hrang hrang a tam tawh hle," a ti a; cyber crime buaipuitu police an la tlem thu leh thubuai khawih tur a pun chak thu sawiin, MJA leh tlawmngai pawl hrang hrangte chu thawhpuiah a sawm a ni.