Bana Kaih scheme-ah November 2024 chhungin progress partner tur tihfel tum

Mizoram State Policy Coordination Committee (MSPCC) chu nimin khan adviser to Chief Minister KC Lalmalsawmzauva, MSPCC vice chairman hoin Planning conference hall-ah an ṭhukhawm. Bana Kaih Scheme portal-ah dilna 1,314 a luh tawh thu leh November 2024 chhungin progress partner tura thlante tihfel hman tum a nih thu tarlan a ni.

Ṭhutkhawma tarlan danin, Bana Kaih Scheme portal kaltlangin nimin thleng khan dilna 1,314 a lut tawh a; Commerce & Industries department hnuaiah dilna lut tam berin 540-a lut tawh a, Animal Husbandry & Veterinary department hnuaia dilna lut 409-in a dawt. Dilna lut zinga 1,292 chu mimal anga dilna a ni a, 22 chu pawl anga dilna a ni.

KC Lalmalsawmzauva chuan, Bana Kaih Scheme-a dilna lut tawhte chu uluk taka zir a, hlawhtlin ngei tuma theihna neite leh tih tak takna nena beih tumte'n an mamawh ang ṭanpuina an hmuh ngei theih nana hma la turin nodal department-a thawktute a chah a, "Nodal officer-te'n dilna thehluh kawnga hriat chian duh leh harsatna neite chu kaihruaiin theihtawpin pui zel ang che u," a ti.

Ṭhutkhawmah hian sorkar department 16 aṭangin nodal officer leh assistant nodal officer-te an tel a; nodal department-te hmalakna bakah, dilna thehluhna dik lo leh trade siam rem ngaite, dilna thehluttute tana awlsam zawk nana portal siamṭhat ngaite sawi a ni. Planning secretary Lalmalsawma Pachuau pawhin thu a sawi bawk.