PM Gati Shakti zirhona buatsaih

Ministry of Development of North Eastern Region (DoNER) leh Bhaskaracharya National Institute of Space Applications and Geo-Informatics (BISAG-N) bultumin nimin khan Mizoram Legislative Assembly conference hall-ah 'Capacity Building cum Sensitization Workshop on PM Gati Shakti of Mizoram' buatsaih a ni a, sorkar department 40 aiawhte an tel.

Zirhona hi Planning and Programme Implementation secretary Lalmalsawma Pachuau-in a hawng a; Gati Shakti portal chu Mizoram sorkar department hrang hrangte'n an la hriatthiam tâwk loh avangin an la chhawr ṭangkai tâwk loh thu a sawi.

Lalmalsawma Pachuau chuan, zirhona a zawh hunah chuan Geographic Information System (GIS) behchhanin project-te an siam tawh dawn a, project insiam thuah leh dik lote a awm tawh dawn loh thu a sawi a, "Concept paper leh detail project report-te kenga Delhi-a kalpui ngai ṭhin te, e-mail leh dâk hmanga thawn ngai ṭhinte chu online hmangin a tih theih vek tawh dawn a ni," a ti.

DoNER (IT) director Vivek Gupta pawhin thu sawiin, PM Gati Shakti hnuaia hmalakna peng pakhat 'Poorvottar Vikas Setu' chu India hmarchhak state pariatte puala siam a nih thu a sawi a; Poorvottar Vikas Setu portal kaltlanga project hrang hrang buaipui dan leh a kaihhnawih thil pawimawh hrang hrangte a tarlang.

Zirhonaah hian Poorvottar Vikas Setu portal hman dan te, DoNER Gati Shakti portal leh Single Mater Plan portal chungchang inhrilhfiah a ni a; sawihona leh zawhna leh chhanna hunte hman a ni.