Covid-19: Mizoram dinhmun CCC vengtu police 3-in an kai
September 7, Thawhṭanni khan Mizoramah Covid-19 vei mi pakua hmuh chhuah a ni a, an zingah Cavid Care Centre (CCC)-a duty police pathum an tel. Mizorama Covid-19 vei hmuh chhuah tawh zawng zawng chu mi 1,123 an ni. Nimin khan dam tawh mi 13 chhuahtir an ni thung.
Mizorama Covid-19 vei hmuh chhuah tawh mi 1,123 zinga mi 746 (66.43%) chu chhuahtir an ni tawh a, mi 377 (33.57%) an la chhuak lo. La chhuahtir loh zingah hripui vei tawh lo (negative tawh) an awm nual nia thu dawn a ni.
September 7-a Covid-19 vei hmuh chhuahte chu - ZMC laboratory-a hmuh chhuah mi paruk, Vairengte checkgate-a hmuh chhuah hnam dang driver/handyman pahnih (Tripura leh Tamil Nadu lam mi) leh Serchhipa hmuh chhuah pakhat an ni a; Lunglei Civil Hospital (LCH) laboratory-a endik mi 17 zingah hripui vei an awm lo.
ZMC-a hmuh chhuahte chu Aizawl district-a mi pathum leh Kolasib district-a sample lak mi pathum an ni a, mipa panga leh hmeichhia pakhat niin, nausen kum 2 mi a tel.
Aizawl district-a hmuh chhuah tharte chu Berawtlang CCC-a security duty Mizoram police pathum an ni a, Mizoram chhunga kái (local positive contact) an ni. An zinga pahnih, Armed Veng South mi kum 21 leh 25-te'n harsatna an neih loh laiin, Hualngohmun khaw mi kum 27 chuan harsatna a nei (Covid-19 symptom a lang) thung.
ZMC-a hmuh chhuah tho Kolasib district-a mi pathum zinga pakhat chu North Chaltlang khuaa hmeichhe naupang kum 2 mi, August 29-a Tripura
aṭanga lo kîr, quarantine facility-a awm mek a ni a; mi dang pahnih chu Assam-a Hailakandi leh Katlicherra lam mi, mipa puitling ve ve niin, Thingdawl quarantine facility-a awm mek an ni.
Serchhipa Rapid Antigen Test (RAT) hmanga hripui vei hmuh chhuah chu Chhingchhip Mualpuia Assam Regiment sipai, tun hnaia Jammu & Kashmir aṭanga lo haw a ni.
Nimin khan Covid-19 veite enkawlna hmun pathum aṭangin mi 13 chhuahtir an ni a; chu'ngte chu - State Referral Hospital aṭangin civil mi mipa pasarih, Darlawn CCC
aṭangin civil mi mipa pakhat leh hmeichhia pali leh, Lawngtlai CCC aṭangin hmeichhia pakhat an ni.