Rate bituk anga tlan turin chah

Lunglei Auto Rickshaw Owners Association (LAOA) chuan nimin khan Saikuti Hall-ah silver jubilee an lawm a; khuallian Lunglei High Powered Committee (HPC) vice chairman V Malsawmtluanga, MLA chuan, sorkarin lirthei chuan/hman man (rate) a bituk anga dik taka tlan turin auto-rickshaw enkawltute a chah.

V Malsawmtluanga chuan, Lungleia auto ricksaw neitute leh khalhtute chu Lunglei khawpui hmél lanna an nih thu sawiin, "Mipui rawngbawlna tak tak hna vuantu, mipui nena innghênga hna thawk in ni a, in nunphung leh che zia hmangin ram hmel tibâltu leh timawitu in ni thei. Tlawmngaihna, dikna leh rinawmna kawngah Zo nun ze mawi lan chhuahtir zel a ṭul," a ti a; ruihhlo phurh chungchangah inthiar fihlim tur leh sorkarin chuan man (rate) a bituk anga dik taka tlan turin a chah a ni.

Mi taima leh a ngaihna hriate din chhuahna turin sorkarin Bana Kaih Scheme a ruahman thu sawiin Malsawmtluanga chuan, LAOA member-te chu chhawr ṭangkaitu ni tur leh mi dangte hnena puangzartu ni turin a chah a, "He ruahmanna hi sorkarin hlawhtling taka a kalpui theih nan mipui thlawpna leh thawhpuina a pawimawh a ni," a ti.

V Malsawmtluanga chuan, mipuite'n an awmhmun aṭanga mobile app kaltlanga lirthei hman tur an koh theihna tur ruahmanna sorkarin a bawhzui mek thu a sawi bawk a; silver jubilee lawmpui nan LAOA hruaitute hnenah pawisa a hlan a ni.

LAOA hi October 15, 1999-ah mi 14-in an din a, tunah member 600 chuang awmin, stand welfare 17 an awm mek a ni.