Health Secretary-in CCC, ITI a tlawh

Health secretary H Lalengmawia chuan nimin zing khan ITI Veng, Aizawla Covid Care Centre (CCC) a hmunah a tlawh a; September 7, Thawhṭanniah chaw an nghei chu pawi a tih thu a sawi.

Health Secretary hian ITI Veng Local Task Force hruaitute nen Urban Primary Health Centre, ITI Vengah an inkâwm a, CCC, ITI Venga awmte'n September 7-a chaw an nghei nia sawi chungchang leh thil pawimawh dangte an sawiho. H Lalengmawia chuan, CCC-a awmte'n chaw an nghei chu pawi a tih thu leh, tun hnuah thleng tawh lo se a duh thu a sawi a ni.

Health department press handout chuan, "Sawihona aṭanga a lan danin, he centre-a awmte chaw supply-tu hi rinhlelh thil avangin sample lak tura tih an ni a, hemi chhung hian chaw supply-tu hi an khaihlak deuh avanga chaw nghei anga sawi mai an ni tih a hmunah hian finfiah a ni," a ti.

H Lalengmawia chuan, ITI Veng LTF-te harsatna leh mamawhte chu tihhlawhtlinsak nghal a nih tur thu a sawi a, ITI Veng mipuite chu thlamuang taka awm tura chahin, sorkarin ITI CCC-ah administration leh management felfai lehzuala kalpui a tum thu a sawi bawk.

Health Secretary hian CCC enkawltute chu ITI Veng LTF hnenah Covid-19 vei lut leh chhuak zat te, 

ṭul leh mamawh an neihte, information kimchang pe ṭhin turin a hrilh a; LTF hruaitute hnenah, khawtlang neitu an nihna angin thuneihna pawh danin a phal chinah khauh zawka kalpui hreh lo turin a chah a ni.