CYMA-in Transport Minister-ah dan loin licence pek chhuah ṭhin a nih thu an thlen

Central YMA hruaitute chuan nimin khan an president Lalhma­chhuana hoin Transport minister Vanlalhlana a pisaah an kawm a, Aizawl DTO office aṭangin dan loin learner leh driving licence pek chhuah ṭhin a nih thu an thlen a, finfiahna an neihte an hlan nghal.

Central YMA hruaitute chuan tun hnai, hun eng emaw chen kalta aṭang khan, mi ṭhenkhatte leh raltlan zinga mi ṭhenkhatten awlsam taka driving license an nei mai thei ṭhin chu an chhui chian thu sawiin, "Mi eng emaw zat kan kawm chiang a ni. Heta ṭanga kan thil hmuh chhuah chu, Mizoram mi leh sa dik tak zinga mi ṭhenkhatte leh District Transport Office (DTO) a thawktute inthurualin, danin a phût anga learner & driving licence nei thei tura lehkha pawimawh (documents) thil tel ngai nei lote hnenah learner & driving licence pekchhuah a ni ngei tih finfiah a ni," an ti.

Learner & driving licence siam duhte chuan hetiang siam theia in sawi commission ho hnenah document engmah pek ngai loin an bituk zat pawisa tam tham deuh zawk an pe tih sawiin CYMA hruaitute chuan, "Anni hian Aizawl DTO-a thawktute hnenah a pangngaia pawisa chawi ngai aia tam pe ve lehin, an lo siam sak ṭhin," an ti a, hetianga pawn lam mi learners & driving licence siam sak theituten department lama thawktute pawisa an pe ngei tih finfiahna an neih chu Transport Minister hnenah hian an hlan nghal.

CYMA hruaitute chuan thil dik lo ti ṭhin DTO chhunga thawktute leh pawnlam atanga commission lo ti ṭhin office lam thurualpuitute an hre chhuak vek tawh tih sawiin, "Mizoram khawpui ber, Aizawla DTO-in hetianga an tih theih chuan district dangah pawh hlauhthawn kan nei lian viau," an ti a, Transport Minister chu a enkawl department hnuaia dik lo taka learner & driving licence pekchhuaha in hnamhnawite chu dan anga na taka hrem tur leh dan loa learner & driving licence pek chhuahte chu cancel vek tura hmala turin an ngen.

CYMA hruaitute chuan ruihhlo phur ṭhin maxi cab leh public carrier-te ruihhlo an phurh nena an mante chu an public carrier license cancel ṭhin tur te, hnamdang motor, state dang registration nei passenger phur tur ni loin Mizoram hmun hrang hranga passenger phura an tlan ṭhin chungchangte leh lirthei neituten garage neih vek tur a nih chungchangah khauh zawka kal tura ngennate an thlen bawk.