LESDE leh SEIF-in thawhdunna an ziak

Labour, Employment, Skill Development & Entrepreneurship (LESDE) minister Lalnghinglova Hmar hoin nimin khan a pisaah LESDE department hotute leh Schneider Electric India Foundation (SEIF) aiawhte an inkawm a; Mizoram Industrial Training Institute (ITI) pathuma laboratory changtlung tak din turin thawhdunna (letter of intent) an ziak.

LESDE department leh SEIF-te thawhdunna kaltlang hian Mizorama ITI pathum - Aizawl, Lunglei leh Siahaa electrical, solar leh industry automation course zirna tur laboratory din a ni dawn a, sum mamawhte chu SEIF-in a tum dawn.

Heng course zirtirtu tur ITI-a thawk (instructor)-te tan training leh ITI zirlaite tan entrepreneurship training leh awareness session-te SEIF hian a buatsaih dawn bakah, Bengaluru-a SEIF Entrepreneurship Incubation Centre-ah ITI zirlai tam zawk an intuaihriam theih nan thawhho a ni dawn.

LESDE Minister chuan LESDE department leh SEIF-in thawhhona ṭha tak an nei tur chu lawmawm a tih thu a sawi a, "ITI bakah college leh zirna-in dangah pawh a remchan dan anga la thawhho zel ka duh. Mizo ṭhalaite’n skill-ah theihna sang tak an nei a, IndiaSkills Competition hnunhnung berah medal pariat lain hmarchhak state zinga tiṭha ber kan ni," a ti a; Lyon, France-a WorldSkills Competition, 2024-ah pawh India aiawhin Mizo ṭhalai pahnih an tel thu a sawi.

SEIF aiawhte pawhin ITI piahlamah pawh zau zawka Mizo ṭhalaite hmasawn nan thawhho zel ṭha an tih thu an sawi a ni.

Minister hi LESDE secretary Lalmalsawma Pachuau leh director Angela Zothanpuii te’n an ṭawiawm a; SEIF chief operating officer Abhimanyu Sahu leh a thawhpuite an tel bawk.