Hmasawnna kalpui turin Mizoram sorkar a inpeih thawkhat tawh - F Rodingliana

Commerce & Industries minister F Rodingliana chuan nimin khan Champhaia Aui Garden-ah 'State Handloom Expo - Hathkargha Mela' a hawng. Minister chuan, "Mizoram sorkar chu hmasawnna kalpui turin a inpeih thawkhat tawh," a ti.

F Rodingliana chuan, Mizote chu hnam naupangna alan chianna chu handloom-ah a nih thu sawiin, "Mizoram sorkar chu hmasawnna kalpui turin a inpeih thawkhat tawh a, mipui lam pawh inpeih chho zel turin ka ngen a ni. Bana Kaih scheme hmangin sorkarin mipui khaichhuah a tum mek," a ti a, mipui thawhpuina ṭha tak an hmuh chuan Mizoram hi khaichhuah theih a beisei thu a sawi.

Adviser to CM H Ginzalala, Champhai North bialtu MLA pawhin thu sawiin, ZOHANCO chu Mizo culture vawn him zelna tura a kila lung pawimawh tak a nih thu leh an pawimawhnate mi tinin an hriat deuh deuh a ṭul thu a sawi a; Champhai South bialtu MLA Lt Col Clement Lalhmingthanga chuan, "Mizote kutkawih hi rampum huapa pho chhuah tlak leh eizawnna atana hman theih khawp a rotling a ni," a ti bawk.

ZOHANCO chairman Lalliansawta chuan Mizote chu kut themthiamna lamah theihna sang tak nei an nih thu sawiin, "Handloom leh handicraft lam hi hnam angin kan bawh nasa lo a, heng thilte hi hnam symbol ni thei tur khawpa siam turin ZOHANCO-in a buaipui mek. Hnam angin kan theihna kan lantir chhoh a, ram tana chhenfakawm khawpa hmalak a ngai a ni," a ti a; mahni hnam kutchhuakte tiphuisui a, hmasawn zawnga kalpui zel a pawimawh thu a sawi.

Mela hawn inkhawm hi Commerce & Industries secretary Dr Lalzirmawia Chhangte-in a kaihruai a; stall 44 hawn niin, October 29, 2024 thleng a awh dawn a ni.