KHAWTHLIR

SP, DIPRO leh MJA inkawm

Mamit SP Pukhraj Kamal chuan nimin khan a pisaah Mamit Information & Public Relations officer Biaknungi leh MJA Mamit district member-te a kawm. SP chuan thawhhona ṭha tak an neih a beisei thu te, ruihhlo hluar nasa tih tlem te, rukru tih tlem te, NGO-te nena thawhho ṭhat leh khawtlanga muanna awm chhunzawm zelte a ngaih pawimawh thu a sawi. MJA-te pawhin an harsatna leh police-te lak a an beiseite thlenin, in lungrual taka thawhho zel an tum thu an sawi.

Intodelhna tur sawiho

Khawzawl additional DC Lalfakzuala kaihhruaiin nimin khan sorkar hotuten Khawzawl district-a buh, alu leh hmarcha chìn bakah arsa, sangha, kel sa leh artui hmanga intodelhna siam chungchang an sawiho a, harsatna hrang hrang awmtea ṭanpuina pek dan tur an rel nghal.

Inven dan lehkha

Khawzawl DC K Vanlalṭhiana hoin nimin khan a pisaah Mizoram State AIDS Control Society aṭanga an dawn - HIV/AIDS leh Sexually Transmitted Infection (STI) laka invenhim dan tur lehkha sem dan tur sawiho a ni a; YMA nen ṭangkawpin heng lehkhate hi in tina sem leh vantlang hmun hrang hranga tar an rel.

Hnahthial QRT training

Hnahthial SDO (Sadar) Esther Leihang kaihhruaiin nimin khan DC conference hall-ah Hnahthial district-a quick response team (QRT)-te tan first aid leh cardiopulmonary resuscitation (CPR) training buatsaih a ni a; Hnahthial chief medical officer Dr R Lalsanglura'n ORT member-te chu thil pawimawh hrang hrang a hrilhfiah bakah, an thil zirte hi a takin an tihchhin nghal a ni.

Heroin man

Assam Rifles leh Zokhawthar Police ṭangkawp chuan October 15, Thawhlehni khan Melbuk kawng, Zokhawthara motor an endiknaah Vanneihce (20), Kaley, Myanmar nia inchhal hnen aṭangin heroin gram 47 an man. Heroin hi cheng nuai 32.9 man hu in an chhut a, a neitua puh nen hian Zokhawthar Police-te'n kawlin, thubuai an ziaklut nghal a ni.