MPCC President-in BJP leh ZPM a sawi zawm

Congress Party chuan nimin khan Sinlung Hills Council (SHC) inthlan lo awm tur atan Sakawrdaiah campaign bul an ṭan a, thusawitu MPCC president Lal Thanzara chuan BJP leh ZPM-te a sawi zawm.

Lal Thanzara chuan ZPM-te mipuiin an enchhin mek laiin, central-ah pawh an thurualpui leh an kingpui MLA pahnih nei BJP-in an enchhin ve mek tih sawiin, "BJP MLA-te dinhmun leh chanvo hi engtin nge an chinfel dawn an thlir mek a ni. Nimin khan helai hmunah kan Chief Minister chuan 'mi rinawm lo zui hi in bat niin a lang lo' a ti a, a dik khawp mai. Vawiinah hian zui tlak loh leh zui ngam loh an sawi dawn a nih chuan ZPM hi an ṭiavai mai ang tih ka hlau," a ti.

HPC (D) nena inremna chu an party hmalakna a nih thu sawiin MPCC President chuan, "Ram buai hrehawm zia hre lo ṭhangthar zawkte chuan remna leh muanna hlut zia hi an hre lo. MNF khan an sorkar lai khan HPC(D)-te nena inbiakna pawh an nei a, mahse Pathian malsawm tlak a ni lo nge, a hlawhtlinna hmel hmuh tur a awm lo," a ti a, Congress sorkarin remna leh muanna a ngai pawimawh a, theihtawp a chhuahna a zarah inremna a awm theih thu a sawi.

MPCC President chuan SHC inthlanah hnehna an chan chuan Congress Party leh HPC (D) inremna angin Sakawrdaiah ngei headquarter bunin hma an la dawn tih a sawi a, "SHC-ah hian Congress-in sorkar kan siam a nih chuan kan fund neih ang angte kan hmang ṭangkai dawn," a ti a, an candidate-te vote tling ngei turin SHC mipuite a ngen.

Mizorama hydel project 12 zinga pakua chu Congress Party kut chhuak a nih thu sawiin Lal Thanzara chuan, "PC hun laiin pahnih siam a ni a, MNF hun laiin Serlui B chiah siam a ni. Tuirialte hi an sum duh vanga an tih tawp tawh kha Congress chuan hman theihin kan siam ṭha leh a ni," a ti a, tuna sorkarin Tuivai Hydel Project a din tawh pawh Congress sorkar laia an lo ruahman tawh leh sum pawh awm sa a nih thu a sawi.

Thusawitu dang MPCC sr. vice president Lalnunmawia Chuaungo chuan, "Vawiina rawn kalte hi SHC pian dan hre pha deuh vek kan ni a, helai velah ram a buai a, inkahnate a awm ṭhin. Chu chu ṭha ti loin Congress sorkar chuan HPC(D)-te nen inbiak remna a neihpui ta a ni. Chumi inbiaknaah chuan SHC din in duh a, chu chu Congress Party chuan a tihlawhtling ta a ni," a ti.

Lalnunmawia Chuaungo chuan SHC piantirhin sorkar lama a buaipuitute zingah a telve thu sawiin, "Mipui ngaihdante pawh lak a ni. Mipui duhdanin SHC inthlan chuh turin a area-a cheng leh vote neite chauh an ni tur a ni tiin Congress sorkarin a siam. Tunah chuan council huam chhunga mi ni lo pawhin an rawn chuh thei ta," a ti a, SHC huam chhunga cheng ngei, lu phum tur ngei thlang turin SHC mipui a sawm.