CM-in RIPANS Graduation Day a hmanpui

Regional Institute of Paramedical & Nursing Sciences (RIPANS) chuan nimin khan Baptist Centre, Falklandah 24th Graduation & Lamp Light Ceremony an buatsaih a, chief minister Lalduhoma'n a hmanpui.

Chief Minister chuan, Mizoram mai ni lo, India ram huap pawha paramedical science zirna changtlung leh ṭha RIPANS kan nei chu kan vanneih thu sawiin, "Mizo ṭhalai tam takten he hmunah hian zirna ṭha tak tak an lo dawng tawh a, an dawng mek zel. Vawiinah pawh ṭhalai eng emaw zat an pass chhuak a, chumi rualin zir thar tur tam tak an lut. Graduate tharte ka lawmpui a, hah tak leh rim taka in lo zirte kha vawiinah chuan ram leh mipuite rawngbawl nan in hmang thei ta," a ti.

Zirlai lut tharte chuan an dam chhunga an thawh tur hna atan inbuatsaihna an ṭan dawn tih sawiin CM chuan, "Mipuiten nangni ang thiamna nei kan mamawhna hi a sang tial tial a ni. In pawimawhzia hi hman ni lawka khawvelin hripui a tawrh lai khan fiah takin a lo lang a, khawvel mipuite hian kan health professional-te lakah lawmthu sawi mawlh mawlh tur kan ni. Hna ṭangkai, rawngbawlna pawimawh thawktu in nih hrerengin, mite tidamtu, mite thlamuantu in ni zel dawn nia," a ti a, inhlawhna emaw an tih chuan an inchhir tur thu a sawi.

Lalduhoma chuan RIPANS aṭanga zir chhuak leh zir thar turte hnathawh tur chu inhlawhna ni loin rawngbawlna leh kohna ropui tak chhanna a nih thu sawiin, "Lamp lighting ceremony hi chu chu min hriatpui. Mahni inphata midang tana inpeknain kaihruai tlat che u se la, in awmna apiangah malsawmna ni zel ang che u," a ti a, RIPANS thuneitute chu harsatna an tawh mek, a bik takin faculty lama an indaih lohnate chu theihtawp chhuahin a ngaihtuahpui dawn tih a hrilh.

RIPANS director Prof. Sanjay D Sawant chuan an college dinhmun tlangpui leh an hmalak dante tarlangin, Chief Minister-in an hun buatsaih a hmanpui avanga an lawm thu a sawi.

24th Graduation & Lamp Lighting Ceremony-ah hian B.Sc Nursing degree hi mi 39 ten an graduate-a, 1st Semester zirlai thar tur mi 53, India hmarchhak state pariat leh Jammu & Kasmis aṭanga kal khawmte lakluh an ni bawk. RIPANS aṭang hian batch hmasa ber; kum 1996 aṭanga vawiin thlengin mi 788 te an graduate tawh. Graduate tawh zawng zawngte hian thawhna tur hmun (placement) an hmu vek a ni.