Thiamna nei tak takte tan zau zawkin hun a inhawng zel - Dy. Speaker

Assembly deputy speaker Lalfamkima, Kolasib bialtu MLA chuan nimin khan Kolasib Vengtharah Mizoram Youth Commission Coaching Centre, Kolasib, 2024 Session a hawng a, sorkar tharah thiamna nei tak takte tan zau zawkin hun a in hawn zel thu a sawi.

Lalfamkima chuan, Kolasib-ah MYC Coaching Centre neih a nih theih nan bialtu MLA chhuaktain ṭhahnemngai takin hma alo lak tawh thu leh hun engemaw chen hman ṭangkai a nih tawk loh hnua tharthawh leh a ni tur chu a lawm thu a sawi a, "Sorkar tharah hna lak chungchangah party induhsakna a awm lo a, a thiam leh ṭha apiang lak an ni a, chuvangin thiamna nei tak takte tan zau zawkin hun a in hawng zel," a ti.

Hlawhtling tur chuan tih tak takna a pawimawh thu sawiin Lalfamkima chuan, "Ṭhalaiten an awm danah duhtawk mai loa rualelna nena competitive exam-te an hmachhawn a ngai. An hlawhtlin lohna chhan chu an thiam loh vang ai mahin, rualawhna leh midang elna nei loa competition an hmachhawn ṭhin vang zawk niin a lang," a ti a; mi hlawhtlingte beihna leh tawrhnate entawn ṭhin turin ṭhalaite a chah.

He hunah hian DRDO project director Lalmuan Puia leh MJA Kolasib district president Andrew Vanlalauvate pawhin thu an sawi.

Kolasib MYC Coaching Centre-ah hian coordinator Lalnunhlua, LDC pakhat leh peon pakhat awmin, Govt. Kolasib College-a Dr Lallianzuali Chhangte (history), Vanlalmalsawma (economics) leh Kolasib DRO Zoremmuana Ralte (economics)-te chu zirtirtu (faculty) an ni.

September - December, 2024 session chhunga zir turin mi 10-in admission an ti tawh a, coaching class hi Govt. Kolasib College-ah neih ṭhin tur a ni.