Freedom Concert - Charity Concert buatsaih dawn

Patriotic Revolutionary Movement (PRM), Aizawl leh Mizo Village Volunteer (MVV), Lamka hruaitute chuan nimin khan Aizawl Press Club-ah thuthar thehdarhtute an kawm a; Manipur-a tlang mite laka Manipur sorkar thil tih dan chu an dodal tlat thu leh a ṭul anga hmalak zel an tum thu sawiin, October 28-29, 2024 khian 'Freedom Concert - Charity Concert' neih an tum thu an sawi.

PRM leh MVV hruaitute chuan, Manipur sorkarin Manipur-a Mizo kristiante chunga tawrhna a thlen chu khawvel hmun hrang hranga Mizote chunga thlentir angah an ngaih thu an sawi a, "Mizo tawh phawt chunga harsatna leh buaina thleng hi kan zavai chunga thleng a ni tih hriain, ṭanrual a, feikhat chawia phawkhat vuan tlang ṭheuh turin kan insawmin kan ngen a ni. A tawp thlenga kan hmelma do tlang tur hian Mizo mipui zawng zawng kan ngen che u," an ti.

Manipur sorkar chuan Manipur-a Mizo kristiante chu hnawhchhuah vek a tum nia sawiin pawl pahnih hruaitute chuan, "An ram luahte a neih theih nan ramdang mi (foreigner)-a puhin opium chingah dawtin khawvel hmaah anmahni thil tih ngei thup nan media kaltlangin bihruk a la tumzui bawk a ni. Mizote chunga thil thleng mekte hi Meitei-te leh Kuki-te inkar buaina anga lantir a tum hi kan pawm loa, Mizote leh Meitei buaina zawk a nih angin Mizo hnam pum ang zawkin he buaina hi kan kalpui zel tawh dawn," an ti a; buaina chinfel aia buaina punlun zawnga Manipur sorkarin hma a la zui zel a nih chuan a tawp thlenga hmachhawn tura an inpeih thu an sawi.

Pawl pahnih hruaitute chuan Manipur, Myanmar, Bangladesh leh hmun hrang hranga Zo hnahthlakte harsatna leh buaina sutkian a nih theih nan mahni theihna zawn ṭheuhah ṭangrualna a awm theih nan October 28-29, 2024 khian 'Freedom Concert - Charity Concert' neih an tum thu leh Mizo zawng zawng luang chhuak tura an ngen thu an sawi bawk.