Kolasib DC-in NHIDCL hotu a kawm; Theihtawp chhuah turin a ngen

Kolasib DC Robert C Lalhmangaiha chuan October 14, Thawhlehni khan a pisaah NHIDCL executive director Virender Jhakar a kawm a, National Highway (NH)-06 & 306 thawmṭhat hna thawh kal meka NHIDCL hmalak tawhna leh hmachhawpte a sawipui. NHIDCL Executive Director chuan, Vairengte - Bilkhawthlir, Kolasib - Kawnpui leh Kawnpui - Khamrangte chu kumin November thla aṭanga black top tur niin, thla 6 chhunga zawh an tum thu a sawi.

Robert C Lalhmangaiha chuan, Kolasib district tan tlangtu NH-06 & 306 chu state dang aṭanga Mizoram luhka ber leh Mizoram mamawh châwkluhna ber a nih thu a sawi a, "Lirthei tlan leh a hmang ṭangkaitu an tam avangin kawng siam hna chak taka kalpui a nih theih nan leh ṭha taka siam a nih theih nan theihtawp chhuah ang che u," a ti a; monitoring team hrang hrang leh tlawmngai pawlte pawhin theihtawpa an enpui tur thu leh a ṭulnaa pui turin an inhawn reng thu a sawi

NHIDCL executive director Virender Jhakar chuan tun hnaia NH thawmṭhat hna thawh ṭan tura ruahmante tarlangin, "Kawng ṭha tak siam a nih theih nan theihtawp kan chhuah dawn. Vairengte - Bilkhawthlir, Kolasib - Kawnpui leh Kawnpui - Khamrangte chu kuminah black top tur niin, kumin November thla aṭanga thawk ṭanin thla ruk chhunga zawh kan tum," a ti.

He hunah hian NHIDCL hnuaia kawng siam hna thawktu tur Balaji Construction aiawh Ram Niwas pawh a tel a ni.