Vawiinah Mizoram district 6-ah LC leh VC inthlang dawn

Mizoram district parukah vawiin hian village council leh local council thlan a ni dawn. Hetih lai hian, local council pakhat leh village council 13-ah candidate-te chuhtu an awm lo. Chuhpuitu nei lo candidate 67 awm zinga 44 chu Congress candidate-te an ni.

VC leh LC atan hian tukin zing dar 7:00 aṭanga tlai dar 5:00 thleng vote thlak theih a ni dawn a, vote thlak hun a tàwp rualin vote tlate chhiar nghal a ni ang. Thlan tlinte chu May 7, 2015 ral hmaa executive body din tura tih an ni.

Vanglaini palai zawhna chhang­in State Election Commission (SEC) secretary H Darzika chuan, inthlan turah an inpeih vek tawh tih sawiin, "Ruahmanna a kal tluang a, harsatna a awm lo turah kan ngai. Venhimna lam police-te'n ṭha takin an buaipui a ni," a ti a; khaw 31-ah erawh chuan HPC(D)-te vauna vangin inthlan buatsaih theih a ni lo tih a sawi.

Vawiina LC leh VC thlan tur hi seat 2,817 a ni a, candidate 7,129 an awm. Seat 2,817 zinga 743 chu hmeichhe tana hauh a ni a, hmeichhe candidate zat chu 1,783 an ni.

Political party zingah Indian National Congress (INC)-in candi­date an ngah ber a, candidate 2,625 an nei. MNF party-in candidate 2,151 an nei a; ZNP-in 753, MPC-in 154, BJP-in 215, NCP-in pakhat leh independent candidate 1,230 an awm bawk.

Hetih lai hian, khaw ṭhenkhatah chuan VC inthlan turah sorkara thil phût neih vanga vote thlak tum lohna khua a awm a; SEC hotute chuan, vote thlak tum lohna hmunah pawh inthlan buatsaih turin ruahmanna kalpui vek a ni tih sawiin, "Vote thlak tum lote hian kan hnenah engmah an rawn thlen loh avangin khaw engzat chiah nge an nih kan hre thei lo," an ti.

VC-a seat leh candidate zat

District Seat Candidate

Aizawl 395 812

Lunglei 591 1,679

Serchhip 215 582

Champhai 468 1,179

Mamit 357 927

Kolasib 256 713

Local Council 535 1,237