Trade Expo hawng zui thei lo
Lammual sira 3rd International North East Trade Expo 2015 neih mek chu, nimin khan Mizoram Merchants Association (MIMA)-te'n titawp tura an tih avang leh, Aizawl DC-in khâr rih tura a tih avangin an khâr rih.
MIMA-te hian Expo buatsaihtute chu April 28 khan titawp turin an hriattir a, Mizoram sorkar aṭanga phalna felfai nei loah an ngai a ni. Hei vang hian Expo buatsaihtute chuan nimin khan an hawng lo a, an hawn loh chhan chu Aizawl DC-in hawng rih lo turin a tih vang a nih thu an sawi. Zing dar 10:00 velah MIMA hruaitute chu Expo neihna hmunah an kal a, nilengin an duty zui a; buaina chhuak erawh a awm lo.
Expo khâr rih tura titu Aizawl DC Dr Franklin Laltinkhuma chuan, Ranjan B Gohain chuan sumdawn phalna a nei lo tih sawiin, DC chu sumdawn phalna pe theitu a nih loh thu a sawi a, "Sumdawnna lam thil expo buatsaih thei a ni chiah lo a, sumdawnna lam khawihtu sorkar department-te nen ṭanghoa ti chu ni se a dik ang," a ti.
International North East Trade Expo huaihawttu Ranjan B Gohain-a'n Vanglaini palai zawhna chhanga a sawi danin, an hriat theih chinah phalna neih ngai an nei vek a; Assam Rifles aṭangin phalna an nei a, Aizawl Municipal Council aṭangin phalna an neih bakah, publicity tax Rs. 25,000 an chawi a, Taxation department-ah VAT Rs. 50,000 an pe tawh a ni. Aizawl Sub-Division Magistrate aṭangin aurinna hman phalna an nei bawk.
Hetih lai hian, MIMA president PC Laldinthara chuan Vanglaini palai zawhna chhangin, Expo buatsaih tur hian Mizoram sorkar aṭangin phalna an nei loa an ngaih thu a sawi. Sorkara thuneitute thupek ni loa anmahni'n titawp tura an tih chhan zawhna chhangin, MIMA president chuian, "Sorkarin tih a tum si lo a, kan ti ta a ni," a ti.
Expo chu dan loa tih a nih thu leh tihtawptir turin sorkarah an thlen hmasa em, tih zawhna chu MIMA president chuan an chhang thei lo a; MIMA hruaitu dang pakhat chuan, "Taxation-ah kan zawt a, tax kan laksak an ti a; licence an nei loah kan ngai," a ti.
International North East Trade Expo chungchangah hian Taxation commissioner K Sanglawma chuan, phalna petu an nih loh thu sawiin, "Tax pekna tur kan ni. Tax hi advance-in Rs. 50,000 kan pektir a, Expo zawhah bungraw hralh zat aṭangin an tax pek tur zat dik tak chu kan chhût chhuak ang a, an la pe leh ang," a ti a; Expo atana Mizoram pawn aṭanga bungraw lâk luhte chu Vairengte-ah an chhinchhiah vek thu Vanglaini palai a hrilh.