Legal Metrology-in gas bûk tling lo man Gas lak rualin receipt la tel turin an ngen

Legal Metrology chuan, nimin khan Zoram Indane ta tur gas bûk tling lo bûr 25 an man a, tun hnai chawlhkar khat chhungin gas tihchingpen bûr 496 an man. Legal Metrology hotute chuan, mipuite chu gas an lak reng rengin receipt la ngei turin an chah.

Nimina Legal Metrology-te'n gas bûk tling lo an manna chu truck NL-04 D-2444 aṭangin a ni a, truck driver chu L Bahadur Yadav a ni. Gas bûk tling lo bûr 25-te chu a buk tlin lohna anga a man tihniam turin agency an hriattir a, truck driver chu Rs. 3,000 an chawitir thung.

Legal Metrology chuan April 22, 2015 khan truck AS-11 AC-9324 aṭangin Vanbuangi Gas Agency ta tur gas bûk tling lo bûr 161 an man a; hemi ni vek hian MZ-05 3342 aṭangin Zopuii Gas Agency ta tur bûr 10 an man bawk. April 24 khan MZ-01 D-6379 aṭangin Suakchhunga Gas Agency ta tur gas bûk tling lo bûr 200 an man a; April 25-ah MZ-01 D-6914 aṭangin Zoram Indane ta tur gas bûk tling lo bûr 100 an man bawk.

Legal Metrology joint controller Thangtinliana Pachuau chuan, gas bûk tling lo an mante chu a bûk tlin lohna ang zelin mipuiah a man tlawma hralh turin agency-te an hriattir ṭhin thu a sawi a; a bûk tlin lohna zat hû chu a phurtu driver chawitir ṭhin a nih thu sawiin, "Dan ang tak chuan hralh chhuah loh tur a ni a, mahse mipuite'n an mamawh tho si avangin a man tlawmin kan hralhtir mai ṭhin a ni," a ti.

Legal Metrology hotute chuan, gas bûk tling lo an mante pawh a man tlawma hralh tura an tih ṭhin avang hian, gas latute chu receipt la tel zel turin an chah a; chu chuan agency-te'n a dik loa thil an tih tur a véng thei dawn niin an sawi.

Gas leh thil dangah pawh, thil dik lo a awma an hriat chuan an hnena hriattir zel tura mipuite ngenin, "Telephone tal pawhin min rawn hrilh se, kan ûm zui a, action kan la nghal zel a ni. Complaint ûm zui loh kan nei mang lo a, ziaka lut phei chu bawhzui loh kan nei lo," an ti. Complaint erawh an lut tam lo hle tih Vanglaini palai an hrilh.