KHAWTHLIR

Pass-te lawmpui
MZP leh MSU-te chuan thuchhuah siamin, MBSE-in HSLC 2015 result a tichhuak chu lawmawm an tih thu sawiin, thawktute thawhrimna fakawm an tih thu an tarlang a; zirlai pass-te an lawmpui rualin, pass ve lote an tawrhpui thu an sawi. MZP chuan, HSLC top 10-a lang Mizote chu May 15, 2015-ah an chawimawi dawn thu an sawi bawk.

Thisen pe
Zemabawk Vengthar Branch KṬP-te chuan, an kum 10 tlin lawm nan nimin khan Aizawl Civil Hospital-ah thisen unit 24 an pe a, a petute mipa 20 leh hmeichhia pali an ni. Tanhril Vengthar Kohhran pawhin an kohhran silver jubilee lawm nan nimin khan Synod Hospital-ah thisen unit 24 an pe a, a petute mipa 22 leh hmeichhia pahnih an ni.

Result tihdikna
MBSE chuan nimina tihchhuah tak HSLC Exmination 2015 result-a dik lo tihdikna a tichhuak a; result bu phek no. xi-naa rank no. 5, Lalmuanawma Khiangte s/o Ramdinzauva, roll no. 1501009263 chu Springdale Academy, Champhai a nih thu a tarlang.

Mei zu 10 man
Aizawl District Anti Tobacco Squad-te chuan, nimin khan New Secretariat Complex-a office hrang hrangah mei zu an awm leh awm loh an enfiah a, phal lohna hmuna mei zu mi 10 manin, pawisa an chawitir.

Mi 35,034 inentir
March 2015 thla chhung khan Aizawl Civil Hospital-ah mi 35,034 an inentir a, mi 1,315 admit an ni. March thla chhung vekin nau piang 359 an awm a, mitthi 80 an awm bawk.

MJA Library pe
MJA Public Library-a dah turin JT Vanlalngheta'n a lehkhabu buatsaih, 'The Concise Learner's Dictionary Mizo' bu khat; Zonunmawia'n a lehkhabu ziah 'Titi ngaihnawm' tih bu hnih; JH Lalrinzuala'n a lehkhabu ziah 'Mimawl khawhar sûlhnu' tih bu hnih leh, Lalsangzuali Sailo hriatrengna 'Souvenir' te an pe. Lehkhabu petute chungah MJA-in lawm­thu a sawi a ni.