Kolasib dist-ah ballot paper chhut ṭhat leh a ni

MNF chuan nimin khan Kolasib district-a ballot paper hman tur chu State Election Commission (SEC)-ah an sawisel a, Kolasib district bikah inthlan hun sawn hla turin an ngen. SEC chuan ballot paper chu chhu ṭha turin Kolasib district-a inthlan buaipuitute a hriattir nghal a ni.

MNF thuchhuah tarlan danin ballot paper-ah chuan No & Name of Village Council Constituency tih tur a nih laiin, Kolasib district-a ballot paper hman turah chuan Elector's Serial Number in the Electoral Roll tih a nih thu an sawi a, "Hetiang a nih chuan secret ballot a nihna a bo vek a, miin tu nge a vote tih electoral roll serial number aṭangin a chhui chhuah thei vek dawn a ni," an ti.

MNF chuan, "Ballot paper aṭang hian NLUP kan pek dawn leh dawn loh che u kan hre thei dawn a, NLUP dawng mekte pawh pek chhunzawm tur nge, tih kan hre chhuak dawn che u a ni," tiin an campaign niin SEC-ah an thlen a ni.

Vanglaini palai zawhna chhangin SEC secretary H Darzika chuan, ballot paper chu siamṭhat nghal tura tih a nih thu a sawi a, "An buaipui nghal char char ang a, naktuk zing dar 7:00-ah inthlan kan ṭan hman tho ang," a ti.

Kolasib aṭanga thu dawn danin, Kolasib district-a returning officer-te chuan nimin tlai khan ballot paper siam thar la turin Kolasib an pan hlawm a; an lak veleh an duty-na tur hmun an pan leh nghal a ni.