Saiha dist-a IMR san chhan zir chiang

Rajya Sabha MP Ronald Sapa Tlau hmalaknain, Indian Council of Medical Research (ICMR)-a mithiamte'n tun hnai khan Saiha district-ah kar khat chámin Infant Mortality Rate (IMR) a san chhan an zir chiang.

Sorkar thuchhuah tarlan dan­in, ICMR mithiamte chuan an zir chianna report chu Thawhlehni khan Health minister Lal Thanzara hnenah an pe a; Lal Thanzara ho hian Health department hotute'n hmalak zui dan tur an sawiho nghal a ni.

ICMR mithiamte chuan, naupai laia inentir ngaihthah tam tak an la awm thu te, ei leh in leh zûk leh hmuam tih nasat vanga nu leh nauin harsatna an tawh ṭhin thu te, chêt phung leh ni tin khawsak thianghlimna kawnga an la sàn tâwk loh thute an sawi a; duh anga tui in tur a thianghlim tâwk loh thu te, nu leh nau hriselna kawnga hriatna a la hniam thute leh, mipui zirtirna tam zawk neia theihtawp chhuah a pawimawh thute an sawi bawk.