Chaw nghei mekte'n vote thlak dawn lo
RMSA hnuaia laboratory attendant leh clerk-te leh SCERT Guidance and Councelling-a thawk, tun hnaia an hna aṭanga bàn tâk mi 366-te chuan chaw nghei an la chhunzawm zel a; vawiina village council leh local council inthlanah vote thlak an tum lo.
April 27, 2015 aṭanga PRISM office-a chaw nghei mi 366 aiawhte chuan inthlanah vote thlak loh an tum bakah, an chhungte ṭheuh pawh vote thlak thlak lo turin an ngen tih an sawi a ni.
Laboratory attendant leh clerk-te leh SCERT Guidance and Councelling-a thawkte zinga an convener R Lalzirliana chuan, chaw nghei mek chu mi 70 an nih thu sawiin, an zinga mi pathum, mipa pakhat leh hmeichhe pahnihte chu an chauh tawh avangin nimin khan Aizawl Civil Hospital panpui an ni a, doctor-te'n an endik hnuah chaw an nghei chhunzawm ve leh nghal tih a sawi.
R Lalzirliana chuan, chaw an nghei hnuah sorkar aṭangin thu thar an la dawng lo tih a sawi a; nimin khan MNF vice president pahnih R Tlanghmingthanga leh Dr R Lalthangliana ten an tlawh tih a sawi bawk.