Lengpui Airport thuam ṭhat dan tur CM-in Aviation minister a sawipui
Chief minister Zoramthanga chuan Thawhṭanni leh Thawhlehni khan sorkar laipuia minister hrang hrang a kâwm a, Mizoram mamawhte a sawipui.
CM Zoramthanga chuan Thawhṭanni khan Civil Aviation leh Housing and Urban changtu minister Hardeep Singh Puri chu a pisaah hmuin, Lengpui Airport tihchangtlun hna thawh leh a enkawlna chungchang a sawipui a; Mizoramah thlawhna service tam zawk a awm a ṭul thu leh mipui mamawh phuhrûk tura hmalakna hrang hrangte a sawi a ni.
Zoramthanga chuan, sorkar laipui aṭanga rawtna an lo dawn tawh angin, Mizoram sorkarin Aviation Turbine Fuel (ATF) aṭanga chhiah a lak zat tihniam turin hmalak mek a nih thu a hrilh a; Lengpui Airport enkawl chhunzawm zelna turah Airport Authority of India (AAI) leh Mizoram sorkar ten mawhphurhna an insem chu state economy dinhmun avangin ennawn ni se a duh thu a sawi.
Chief Minister-in rawtna a thlen chu Hardeep Singh Puri chuan ṭha a tihpui a, Civil Aviation hotute leh Mizoram sorkar chu ruahmanna siama bawhzui nghal turin a ti niin sorkar thuchhuah chuan a tarlang. Lengpui Airport tihchangtlun hna thawh chungchang sawiin Chief Minister chuan, Hmunpui tlanga Doppler Very High Frequency Omni Range (DVOR) dah belh hna thawh mek chu thla hnih chhunga zawh beisei a nih thu te, thlawhna din khawmna (apron) zauh hna pawh a chanve aia tam thawh a nih tawh thu te, Isolation Parking Bay siam chu 70% zawh a nih tawh thute a sawi a; Airport hungna (perimeter fencing) siam pawh estimate siam zawh veleh Mizoram sorkarin hna thawhna tur sum a pek nghal tur thu a sawi bawk.
Chief Minister chuan nimin khan Ministry of Road Transport and Highways (MoRTH) changtu minister Nitin Gadkari chu a pisaah a hmu a, Mizorama inkalpawhna tihhmasawn dan tur sawipuiin, Mizorama kawng chhia siam thar ngaite leh sum mamawhte a thlen. Nimin vek khan CM hian United Nations hnuaia péng pakhat, Food and Agriculture Organization (FAO) country director Tomio Shichiri leh a thawhpuite a kâwm bawk a; agriculture leh horticulture lama Mizoram sorkar leh FAO thawh dun theih dan tur a sawipui.
Zoramthanga chuan, Mizoramah chemical fertilizer hmang loa thei, thlai leh pangpar thar chhuahte organic certification pek chungchang te, Mizoram thar chhuahte hralhna tur te, ṭhalai lehkhathiamte leh entrepreneur-te'n horticulture hlâwkna aṭanga eizawnna an neih theih dan tur chungchangte sawiin, chu'ng atan chuan Mizoramin hmanruaa puih a mamawh thu a sawi. FAO leh Mizoram sorkar ṭang dunin kut hnathawktute tan Farmer Field School (FFS) an buatsaih tawh a, hlâwk zawka serthlum leh lakhuihthei chìn dan leh dahṭhata sawngbawl dante inzirtir niin, chuta hmalakna atan chuan FAO aṭangin cheng nuai 18 hmuh tawh a ni.
CM Zoramthanga hi Planning Board vice chairman H Rammawi, GAD Aviation Wing principal consultant J Lalhmingliana, PWD engineer-in-chief K Lalsawmvela, Planning secretary Dr Vanlalramsanga, PHE secretary Amjad Tak leh official dangte'n an ṭawiawm a ni.
CM leh sorkar laipui hotute :
• Civil Aviation leh Housing and Urban changtu minister Hardeep Singh Puri Lengpui Airport chungchang a sawipui
• Road Transport and Highways minister Nitin Gadkari Mizorama inkalpawhna tihhmasawn dan tur a sawipui
• Food and Agriculture Organization (FAO) hotute agriculture leh horticulture lama Mizoram sorkar leh FAO thawh dun theih dan tur a sawipui.