District 6-a VC leh LC inthlan Tluang taka kalpui a ni

Nimin khan Mizoram district paruka local council 82 leh village council 492 inthlanna buatsaih a ni a, harsatna lian tham thleng a awm lo nia thudawn a ni.

Zing dar 7:00 aṭangin vote thlak ṭan a ni a, hmun ṭhenkhatah chuan khar hun tura tiam tlai dar 5:00 thlenga vote an thlak zawh hman loh avangin inthlan hun pawhsei a ni. Vote thlak zawh a nih velah vote tlate chhiar nghal a ni a, he thuziah lai hian result kan hre kim hman lo.

State election commission (SEC) secretary H Darzika chuan Vanglaini palai zawhna chhangin, "Inthlanna tluang taka neih a niin ka hria. Harsatna leh buaina lian tham a thlen awm report kan dawng lo," a ti.

Sorkar thuchhuah tarlan danin, Aizawl, Serchhip, Mamit, Champhai leh Kolasib district-ah chuan MPF te polling station bulah awmin, vote thlak turte an lo buaipui a; Lunglei district-ah chuan vote thlak turte hi YMA in an buaipui thung. SEC chuan inthlan buatsaih kawnga puitu MPF leh YMA-te chunga an lawmthu an sawi.

Hetihlai hian, Mimbung khuaah chuan candidate pakhat hming an ziah dik loh avangin vawiinah inthlanna hi buatsaih ṭhat a ni ang.

Khawzawl V/C-I ah chuan sorkara an thil ngiat tihhlawhtlin a nih loh avangin vote thlak an awm lo a; Ruantlang Mualvengah pawh V/C pek an nih loh avanga lungawi lohna lantirna atan vote thlak an awm lo.

Zawhna chhangin SEC Secretary chuan, "Vote thlak lohna khuaah pawh hian inthlan neihna atana thil ṭul chu engkim kan buatsaih vek. An thil phutte hi SEC tih theih a nih loh avangin kei ni tan chuan tihngaihna vak a awm lo," a ti.

Nimina inthlanah hian V/C leh L/C seat 2,817 awmin, candidate 7,129 an awm a, candidate ngah ber INC chuan candidates 2,625 an nei a ni.

Tun ṭumah hian candidate-te chuhtu awm lohna khua/veng 13 a awm. Heng zinga khaw 12-ah chuan Congres-in sorkarna an siam thei dawn a, khaw khatah MNF leh veng pakhatah chuan independent-in sorkarna an siam ang.