KHAWTHLIR

Centenary lawm

Sialsuk Pastor Bial Inkhawmpui kum 100-na chu nimin aṭang khan Sialsuk Presbyterian Kohhran biak-inah lawm ṭan a ni a, May 3, 2015 thleng an lawm dawn. Centenary lawm nan May 2-ah an pastor bial huapin ruai an ṭheh dawn a, Sialsuk bial­tu pastor leh pro pastor ni tawh te, an bial aṭanga missionary-a chhuak te, an biala kohhran upa lo ni tawhte leh an awmna Presbytery puipa lo ni tawhte tel vek turin an sáwm.

Hna thawh enfiah

UD&PA secretary Dr C Vanlalramsanga chuan, nimin khan Champhai Zotlanga Sports Stadium sak mek a tlawh a, hna thawh dan a enfiah. Sports Stadium-ah hian football ground, running track leh boxing hall-te siam a ni ang.

PUC-ah workshop

Pachhunga University College-a Department of Zoology leh Association for Environmental Preservation (ASEP) te chuan nimin khan PUC seminar hall-ah ‘Wildlife Documentation & Practical Application’ tih thupui zirhona an buatsaih a, PUC Zoology department-a mi te, ASEP member-te leh nungcha humhalh kawnga tui mi ṭhahnem tak an tel.

Free clinic

Lawngtlai district-a AH&Vety department leh Health department-te chuan tun hnai khan Vaṭhuampui leh a chheh­vel khaw mipuite tan a thlawna inentirna an buatsaih. Free clinic-ah hian Health department-a thawkte'n mi 270-te hriselna dinhmun an endik a; AH&Vety department mite'n ran 2,904 an endik bawk.

Society tha

Phullen Consumer Cooperative Society Lt. chu NCDC-in India rama society ṭha a thlan ṭhin, Binneal Excellence Award 2014 for Primary Societies dawng tura thlan a ni. April 29, 2015 khan Phullen Con­sumer Cooperative Society chairman Khuangchhana leh secretary Vanlalnunga ten India President Pranab Mukherjee kut aṭangin New Delhi-ah an dawng.