Taxation dept.-in kumin chhungin Cheng vbc. 166 an hmu tawh

Taxation department chuan sorkar kum kal mek, 2020-21 chhungin July 2020 thleng khan chhiah chi hrang hrang aṭangin cheng vbc. 166 an hmu tawh.

Taxation department hian chhiah chi thum - Goods & Services Tax (GST), Professions Tax leh Value Added Tax (VAT) aṭangin chhiah an hmu ṭhin. Kum kal meka chhiah an hmun dan chu - April thlaah cheng vbc. 14.35, May thlaah vbc. 46.08, June thlaah vbc. 37.46 leh July thlaah vbc. 68.21 a ni.

Taxation dept. hotute aṭanga thu dawn danin, sumdawng tam zawkin chhiah an pek ṭhat laiin, chhiah pe ṭha duh lo eng emaw zat an awm. Chhiah pe duh lote chu pe tura nasa taka nawr ṭhin a ni a, chuti chunga pe duh lote chu Mizoram Public Demands Recovery Act, 2020 hnuaiah an chungchang Certificate Officer hnenah an thlen ṭhin.

Certificate Officer lamin hna ṭul dang an ngah avang leh thawktu indaih loh avangtein an beisei angin recovery a chak tâwk ṭhin lo tih sawiin Taxation department hotute chuan, Covid-19 hripuiin ram pum sumdawnna a nghawng avangin GST leh VAT aṭanga chhiah hmuh zat chu nikum aiin a tlahniam nasa tih an sawi.