Covid-19 vei hmuh tawh zingah Mizorama kái chhâwng mi 147

Covid-19 vei leh vei loh hre turin Mizoram  aṭangin nimin thleng khan mi 45,928 endik an ni tawh a, chu'ng zinga mi 1,123 chuan hripui an vei tih hmuh chhuah a ni a, test tawh zat aṭangin 2.45% a tling. Hripui vei hmuh tawh zinga mi 147 chu Mizoram chhunga kái chhâwng (local positive contact) an ni.

Mizorama hripui vei zinga Mizoram chhunga kái zat 147 chu hmuh chhuah tawh zawng zawng 1,123 aṭangin 13.09% a ni a; state páwn aṭanga rawn lut mi 976 (86.91%) an awm.

Mizorama Covid-19 vei hmuh chhuah tawh mi 1,123 zinga mi 407 chu sipai (army & paramilitary force) an ni a, chu chu 36.24% a tling. Hnam dang driver, Mizorama lut tur RAT hmanga endikna aṭangin hripui vei mi 171 hmuh chhuah a ni tawh a, chu chu hmuh tawh zat 1,123 aṭangin 15.23% a ni. Civil mi vei hmuh tawh zat chu 527 (46.93%) a ni thung.

Tarlan tawh ṭhin angin, Mizoram aṭanga swab sample endikna hmasa ber, National Institute of Cholera and Enteric Diseases (NICED), Kolkata-ah mi panga sample endik a ni a, a hnuah Guwahati Medical College-ah mi 12-te sample endik a ni. Thlawhtheihna thlâwk tihtawp a nih hnuah Silchar Medical College-ah sample 41 endik leh a ni bawk. Mizoram páwna endik zat chu sample 58 a ni. 

April 7, 2020 aṭangin Zoram Medical College (ZMC) Covid-19 Laboratory-ah sample endik ṭan niin, September 7 thleng khan sample 32,006 endik a ni tawh a; Lunglei Civil Hospital (LCH) laboratory-ah sample 1,928, Rapid Antigen Test (RAT) hmangin sample 11,934 leh Lawngtlai District Hospital laboratory-ah sample pathum endik a ni bawk.

Hetih lai hian, ramri luhka hrang hrang leh hmun dang ṭhenkhata screening point hrang hrangah September 7, 2020 thleng khan mi 1,66,026 enfiah tawh a ni.