Ruihhloin a tihbuaite chhanchhuah hna sorkarin a thawk zel dawn - Lalliansawta

ZPM president Lalliansawta chuan nimin khan Synod Rescue Home, Champhai a tlawh a, kalphungthar mipui sorkarin ṭhalai ruihhloin a tihbuaite chhanchhuah hna theihtawpa a thawh zel dawn thu a sawi.

Lalliansawta chuan, "Kan ram dung leh vangah kan thalaite duhawm tak takte ruihhloin a man nasat zia kan hre ṭheuh a, hei hi pawi ka tiin ka vei em em. Kan sorkar pawhin ṭhalaite nun siamṭha tur leh leirem an lo rah theihna turin ngaihtuahna tam tak a seng mek a ni. Kan Chief Minister pawhin sorkarna kan chantirh phat aṭangin khan kan ṭhalai ruihlo ngaite chhanchhuah dan tur ngaihtuahin vawiin ni thlengin hmalakna a kalpui mek a ni," a ti.

Kan ṭhalaiten nun-kawng dik lo an zawhnaah hian chhungkua khaw-tlang leh kohhran bakah sorkar ngei pawh hian mawh a phura a hriat thu sawiin ZPM President chuan, "Nupa inṭhen avanga chhungkaw kehchhia kan tam lutukte hian kan fate nun a tikhaw lo ṭhin. Tin, nu leh pate hian inchhungkhur kan uap tawk lo hlein ka hria," tiin khawtlang leh kohhran pawhin prohramme hrang hrang kan siam tam lutukte hi tih tlem a huna a hriat thu a sawi.

Synod Rescue Centre, Champhaiah hian thawktu mi 13 awmin mi 45, mipa 35 leh hmeichhia 10 an enkawl mek. Thla thum course zela enkawlna hi kalpui a ni.