AR-in minister zin ṭum li tih din an tum; Ṭum hnih dingin, ṭum hnih an tlang lui
Minister of state F Rodingliana, Lengteng bialtu MLA, a bial chhunga a zin chu Assam Rifles-te'n ṭum li tih din an tum a, ṭum hnih ti dingin, ṭum hnih erawh an tlan tlang lui thung.
Minister team zinga telte hnen aṭanga Vanglaini thudawn danin, Assam Rifles-te hian October 11, Inrinni khan Assam Rifles-te hian F Rodinglianate hi pilot car nena an kal chungin Kawlbema an lut tur an lo tiding a, minister hi tunge a hming tihte duty pakhatin a zawt.
Minister hian a nihnate hrilhin, a motor-a designation plate en turin a hrilh a, chumi hnuah pawh a hming a zawh nawn leh bakah, a signature-te a ngaih thu a hrilh.
An inhnial buai deuh hnuah F Rodinglianate hi an kal a, gate-a duty leh an commander chu ngaihdam dil tura tih an ni. Commander leh gate-a duty hian khaw chhunga F Rodinglianate chaw ei laiin ngaihdam an dil.
F Rodinglianate hian bial fan chhunzawm zelin, October 13, Thawhṭannia Ngopa an kal tur chu Ngopa tawntirhah Assam Rifles-te hian lo pharin, ding turin an lo ti. Mahse, F Rodinglianate hi ding duh loin an tlan tlang lui.
Chumi hnuah pawh F Rodingliana hian a bial fan chhunzawm zelin khaw hrang hrang a tlawh a, Assam Rifles-te lak aṭangin harsatna a tawk zui tawh lo.
Nimin khan Aizawl lam panin an rawn haw a, police-te hnen aṭangin Selingah Assam Rifles-te'n lo tihdin an tum tih report an dawng a, Assam Rifles gate bulah hian police lam pawh eng emaw zat an lo awm. F Rodinglianate hi Selingah hian ding loin, Aizawl lam panin an tlan chhunzawm. Dar 1:30 velah Berawtlang zawn vel thlengin, hetah hian Assam Rifles-te chuan barricade siamin kawng an lo dan bakah, lirthei a tlan tlang luih thulha an chil turin kawngah thil zum an lo dah a ni.
Assam Rifles-te lo awmna hmunah F Rodinglianate hi chhukin, dan an nih chhante zawtin, minister team an nih thute an hrilh a ni. Police-te pawhin helai hmun hi an pan ve nghal.
Darkar 2 dawn an inhnial buai hnuah F Rodinglianate hi Aizawl lam panin an kal zui leh a ni. Assam Rifles-te hian an lo tih din chhan an hrilh loa, an lirtheite endik tumna pawh an nei lo.
Social media lamah chuan Assam Rifles-te hian minister motor dan tum an nih loh thu leh ralthuam tawlhruk report an dawn avanga duty an nih thu an sawi nia tarlan awm mah se, official-in engmah thuchhuah an nei lo.