Halpuah leh halmawiah YMA an inrawnkhawm; Kum dang aiin kan khauh zawk dawn - HM

Central YMA chuan October 17, Ningani zan khan Dawrpui Multipurpose Centre-ah Krismas leh kumthar vuakveta halpuah leh halmawi khap chungchangah Aizawl khawpui chhunga branch YMA-te pualin inrawnkhawmna hun an buatsaih a, an hun hmanpuitu Home minister K Sapdanga chuan, kumdang aia an khauh zawk dawn thu a sawi.

Home Minister chuan kum 2019-2012 chhungin Krismas leh kumthar vuakvetah halpuah leh halmawi a awm meuh lo tih sawiin, "Kum 2013 aṭangin a hluar leh ta a, YMA pawh kan hnual hman hle. Kuminah halpuah leh halmawi hal a nih lohna turin sorkarin beihpui thlak a rel a, YMA pawhin beiseina thar a neih phah," a ti.

Kuminah chuan sorkar leh YMA ṭangkawpin theihtawp chhuah a tum tih sawiin K Sapdanga chuan, "Beiseina sang tak ka nei a ni. Kuminah chuan, inngenna ringawt duh tawk loin, dan hmanga khap a ni ang. Khapna dan chu kum dang aia khauh zawka kenkawh a ni dawn," a ti a, hremna pawh khauh taka kenkawh tum a nih thu a sawi.

Inrawnkhawmna hun hi CYMA presi-dent Lalhmachhuana'n kaihruaiin, CYMA vice president Prof. Lalnuntluanga'n inrawn-khawmna buatsaih a nih chhan a sawifiah.

Prof. Lalnuntluanga chuan Krismas leh kumthar vuakveta halpuah leh halmawi halin nghawng ṭha lo tak a neih thu sawiin, "Branch YMA-te ṭhahnemngai taka ṭan tlan a ṭul. Halpuah leh halmawi khap chungchangah hian YMA chuan sorkar hmalakna a thlawp," a ti.

CYMA Vice President chuan mahni branch huam chhung ṭheuhah halpuah leh halmawi hal a nih lohna atana chak taka hmalak chu YMA member-te tih tur a nih thu a sawi.

Inrawnkhawmna-ah hian mi 500 chuang telin, zawhna hrang hrang an neihte chu Aizawl DC Lalhriatpuia leh DIG (NR) H Ramthlenglianate'n an chhang a ni.