CS-in Govt. Residential Quarters sakna tur lungphum a phum

Chief secretary Dr Renu Sharma chuan nimin khan Mizoram New Capital Complex (MINECO) chhunga Mizoram Youth Commission (MYC) office bulah govt. residential quarters type V & VI (Senhri Rûn) sakna tur lungphum a phum. Type V & VI quarters sakna tur atan hian cheng vbc 15.42 hmuh a ni.

Dr Renu Sharma chuan, Mizoram sorkar hnuaia hna pawimawh tak tak chelh, Mizorama awmte tana residential quarters sakna tur lungphum phum theiha a awm chu lawmawm a tih thu a sawi a, "Sorkar hnuaia official-te'n an chenna tur quarters ṭha tak an nei ṭhin hian an hnathawhna kawngah lungmuanna, thathona leh nasa lehzuala inpekna an neih phahna a nih ka beisei," a ti.

Sorkara thawktute chuan an phutawk, an khawsak awlsamna tura an mamawh (basic needs) an dawn ngei chu an chanvo a nih thu sawiin Chief Secretary chuan, "In hnathawhnaa in insawrbing theihna atana puitu a nih zawk ṭhin avangin inthlahrung lo ang che u," a ti a, residential quarters chu mahni inrintawkna pholangtu ni ngei se a duh thu a sawi.

PWD secretary K Lalthawmmawia tarlan danin, type V & VI quarters sakna tur sum hi Special Assistance to State Capital Investment (SASCI) 2024-25 Part-1 hnuaiah hmuh niin, sum sanction hi cheng vbc 15.42 a ni.