KHAWTHLIR

Thisen pe

NIET, Aizawl NSS Unit chuan nimin khan Civil Hospital Aizawl tan thisen unit 88 an pe a, petute mipa 47 leh hmeichhia 41 an ni. Civil Hospital Aizawl Blood Bank-a thawktuten DIET-ah panin thisen hi an laksak a ni.

Zangnadawmna pek theih tih tarlang

Lirtheia chetsualna a thlen palha nunna chân leh na taka inhliamte hnena sorkar laipuiin zangnadawmna (Hit and Run Motor Accident Compensation) a pek theih chungchangah Mizoram sorkar chuan thuchhuah a siam a; kum 2022 aṭang khan sorkar laipui chuan zangnadawmna hi a pek tawh thu tarlangin, "Nunna chân chhungte hnenah Rs 2,00,000 leh na taka inhliam hnenah Rs 50,000 a pe a, a dil dan kawng hmang leh a kaihhnawih thil ṭulte hre chiang duh chuan http://www.gicouncil.in/insura... ah en theih a ni," a ti.

Hrui thlung ṭha

Lunglei additional DC James Miahlung leh LMC secretary Lalrinawma hoin Lunglei District Level Telecom Committee (DLTC) chuan nimin khan Lunglei Joint Local Council Association hruaitute leh Lungleia cable operator leh internet service provider hrang hrang aiawhte nen Lunglei khawpuia cable/wire hrui zam hnawk thenfai leh thlun ṭhat hnatlang an nei a; Kikawn aṭanga ṭanin hrui hlui chhia leh hman tawh lohte lakthlak a nih bakah, hrui hman lai chi hrang hrang chu khawpui tana hnawk lo tur leh felfai zawkin an thlung ṭha.

DC hoin tlawh

Horticulture department hotute chuan nimin khan Lawngtlai DC Cheemala Siva Gopal Reddy hoin R Vanhne rama Runmanga leh B Bawithanga sawhthing hmun leh Sihtlangpui rama Lalbiakdika huante an tlawh. Lawngtlai DC chuan huan neitute chu an thlai chinte hlawk zawka an thar theihna turin Horticulture department-te nen thawhhona ṭha a awm a pawimawh tak zet tih hrilhin, thawhhona ṭha nei zel turin a chah.