Eptu MLA-te'n P&E Minister chunga thil thleng ngawihbopui chiah an ngai lo

MNF Legislature Party (MLP) chuan thuchhuah siamin, Power & Electricity minister F Rodingliana chunga Assam Rifles-te chetdan chu pawi an tih thu an tarlang. Congress Party MLA C Ngunlianchunga pawhin thil thleng chu ngawihbopui chiah a ngaih loh thu a sawi.

MLP chuan October 17 tlai lamah Aizawl khawpui daiah minister zahawm tak F Rodingliana chu 2nd Assam Rifles-te'n zah lo tak leh a programme tibuai zawnga an tih din thu tarlangin, "Kan ram chhung kawng ngeia rei tak ralthuam nen a rikrap a, an dang khawtlai hi pawi kan ti," an ti

Mizo hnam leh democracy zah lohnaah an ngai tih tarlangin MLP chuan, "2nd Bn.Assam Rifles-te hi kan dem tak zet a ni," an ti a, Mizo hnam leh democracy zahawmna humhim a, a mawhphurhna hlen ngei turin Mizoram sorkar an phut.

Congress MLA C Ngunlianchunga chuan nimin zinga a bial chhung Lawngtlai AOC Venga thil hrang hrang a hawnnaah, "Kan ram chhunga Assam Rifles-te inlulin dan hi inhnuaichhiahna niin ka hria, ngawihbopui chiah ka ngai lo," a ti.

C Ngunlianchunga chuan Mizoram Power Minister chu Assam Rifles-ten chhaih buaiin, a zin kawngah harsatna an siam sak tih sawiin, "Mizoram hi rambuai a ni loa, kan minister hial Assam Rifles-te'n harsatna an siamsak hi hnam anga inhnuaichhiahnaah ka ngai," a ti a, AR-te chet dan chu anmahni lamin a chhan an sawifiah ngei theih nan sorkarin hmalakna hmanhmawh kalpui se a duh thu a sawi.